Rexat007

09/09/2024

مبدئياً كدا.. الحقيقة التاريخية بتقول إنه الإنسان السوداني هو أول إنسان وقف على حيلو في الكوكب دا.. ودي كل النظريات متفقة حولها.. الاختلافات الباقية شكلية ساي.. ويبدو إنه نفس ذات الإنسان دا حيكون هو آخر كائن حي واقف علي حيلو في الكوكب دا..

آي.. الإنسان السوداني دا حيعطل كل الأنظمة الإنسانية وحيعمل اختلال في النظام العالمي.. والدلائل والمؤشرات كتيرة لغاية اسع.. بعد سنة ونص بس من عمر الكارثة الإنسانية دي..

يعني مثلاً.. زول اقتصادي يوضح لي كيف بعد سنة ونص من تعطل نظام الانتاج في السودان لسع في حسابات وأرصدة بنكية شغالة وتداول وتحويلات.. مقابل كل العملات الفي العالم الممكن تتخيلها.. بدون ما يكون في أي مقابل قاعدين يقدموهو السودانيين ديل مقابل الأرصدة البسحبو فيها دي.. بياكلو بيها وبشربو بيها وبعملو بيها حفلات وبارات وديسكوهات.. وتذاكر عمرة وقصص كتيرة شديد..

دي اسمها الطفيليات.. في علم الطبيعة.. كائنات بتقتات وتعتلف على الآخرين.. لكن كان بقت مافي تخرب التوازن البيئي.. وتعطل الحياة.. وكان قلت تشيلا بيدك تملاك وتوسخك.. عشان كدا ما عندك حل غير انك تخليها تقتات وتحاول تبعدها منك بس.. المهم السودانيين يقتاتون من موارد الكوكب بدون ما يساهمو أي مساهمة في عملية الانتاج الإنساني.. والمشاركة في عملية الصيد والحصول على الغذاء.. شغالين سماسرة.. وتجارة عملة.. وعايشين في عز ونعيم اكتر من السكان المنتجين.. هم زاتهم مخلوعين.. ما فاهمين انه دا كلو بي حقهم وعرقهم..

الواحد بعد دا مفترض يرجع بفكر في أصل كلمة (زول) انا اتخايلي ممكن نكتشف انها من كلمة (زوال) والله أعلم..

المهم مهما اختلفت نظريات بداية الحياة.. لو طردونا من الجنة.. او جينا من خللية نبتت جوة الموية واتشكلت بعديها الحياة بعملية تطور استمرت لعصور لغاية ما قدر اول بني آدم يقيف علي حيلو في الكوكب دا.. او احتمال يكون دا آدم زاتو.. او اذا كان اساساً مافي آدم.. والخلية دي أصلاً أنثى بعد داك حسب ظروف الميلاد حتطلع في صورة ذكر وأنثى.. وبناء عليها بتتشكل الأعضاء التناسلية والقصص دي.. المهم في النهاية في كائن حي من ضمن كل الكائنات الحية التانية قدر يقيف علي كرعيه.. ويوظف اطرافه الأمامية في عملية الإمساك.. ودا كلو تمهيداً لعملية السيطرة على الكوكب..
يلا أو إنسان فكر في انه يستخدم يديه عشان يسيطر على الكوكب دا هم السودانيين.. آي انتظرو زمن طويل جداً عشان يحققو اغراضهم دي.. وحاولو مرات عديدة من خلال صراعات طويلة امتدت لعصووووووور..

أسع يبدو إنهم خلاص قررو يرجعو لغايتهم دي تاني.. عملو ليهم مسرحية كدا بتاعة حرب وتشرد.. وانفروا في العالم.. وبدو عملية التخريب.. وطبعاً الشرط الوحيد الممكن يخلي السودانيين قادرين يفرضو سلطتهم على باقي البشر ديل.. الا انهم يحولو النظام العالمي دا لنظام فوضوي مافي بني آدم قادر يتعايش معاهو غيرهم..

يعني اتخايلي الشافع المجنون بتاع كوريا داك لو فك مصيبتو القال حتعطل الاتصالات ديك.. الوحيدين القادرين يعيشو في حالة الظلام الحتحصل دي غيرنا.. وحاطلا.. عشان كدا الناس تحافظ على خبرتها التراكمية دي وتنتظر اللحظة المناسبة لاطباق عملية السيطرة دي.. وساعتها انا متأكد دي حتكون الواقعة زاتها..
والجحيم يبدو حيكون الحياة الحيعيشوها البشر بعد يلقو روحهم مضطرين يطبقو النموذج السوداني دا.. غايتو ربنا يستر بس..

30/08/2024

في بعض الناس بعتقدو وبيؤمنو وقاطعين الشك تماماً إنه الرزق بتوزع الصباح.. كان ما صحيت ليه والنومة شالتك حقك راح.. وانا واحد من الناس العايشين علي الوهم دا.. آي والله.. بنفس الصورة بتاعة انه بجي الصباااااح ملاك طاير يوزع الارزاق للناس الصاحيين.. وببول في اضنين الناس النايمين.. عشان كدا لمن انوم لغاية الساعة عشرة ولا حداشر.. بجيني صداع.. طبعاً الناس بقولو عشان فوتو زمن شاي الصباح.. لكن دا لا شاي صباح لا شئ.. انت أضانك مليانة بول.. وخش ليك في راسك عمل ليك تقلة الراس دي.. خش الحمام نضف أضنيك ودخل فيهم موية وطلعها.. بتبقى كويس.. وتاني اصحى بدري عشان ما يبولو ليك في راسك..

طبعاً.. الاعتقاد دا في ناس كدا ما بنفع معاهم.. عشان كدا بقولو ليك دا وهم وبتاع.. لكن عموماً.. كونك تصحى مع الشمس لمن تطلع.. وتنجمع كهفك ولا محل منيمك دا مع المغرب.. دي الشروط بتاعة الطبيعة النحن كبشر لقينا روحنا فيها دي.. كان خالقنا الله.. كان قايمين برووس.. من الواطة دي زي شجر السنمكة.. ما معروف الزارعنها منو..

فعشان انت مثلاً طبيعتنا دي ما عاجباك.. وعندك طبيعة قاطعها من راسك.. انت زاتك ما متأكد هل هي طبيعة ولا خزعبلات.. مافي مشكلة.. نتفق.. نقسم الكرة الأرضية دي رأسي وأفقي.. بيناتنا.. نعمل زي نظام فصل المدن الصورو لينا في الأفلام دا.. نخلي الناس الطبيعيين عايشين عادي في الكوكب.. وجوة كل مدينة نعمل لينا منطقة كدا البدخل فيها دا الزول الداير يطلع من نظام الطبيعة.. ونعمل لينا حرس في البوابات.. الداخل ما مارق.. الا بتصريح ولأغراض محددة معانا.. ونحن كل مرة بنتفرج على نظامكم.. كان عجبنا بنخش ليكم.. وانتو كان فيكم واحد وصل لقناعة انه ينصاع معانا لقوانين الطبيعة ويبقى زول ساي زينا كدا.. يسجل فيديو يعترف فيه بالكلام دا.. ويرجع يعيش عادي.. لكن تاني حسو عينو يقعد ينظر لينا في طبيعتنا..
ولا شنو؟!

المهم الناس تاني تصحى الساعة خمسة ونص.. تستلم ارزاقها تختو تحت المخدة وترجع تكمل نومتها.. بس ما تعملوها ظاهرة عشان ما يقولو عبدة شمس كمان.. الموضوع كدا ح تخش فيه اطراف تانية..

30/08/2024

اكتشاف: لو طبخت الشُرُو مع الروب والدكوة.. بعمل ملاح شروب ظااااابط..

28/08/2024

قبل يومين كتبت المقال دا.. في حالة كنت عاوز اوصف فيها قيمة دوري الدافوري بتاع ميدان الصديقاب.. فتحت الفيسبوك عشان انسخو وانزلو لقيت الفاجعة في نص ميدان الصديقاب..
"دوري الدافوري.. بتريعة البجا.. استمرار للحياة تحت نيران الحرب..
ظلت قرية تريعة البجا، التي تقع على ضفاف النيل الأبيض، بجبل أولياء، والتي عرفها الجميع عبر تقارير جمال عبد الله مراسل برنامج عآآآآآآلم الرياضة من استاد جبل أولياء..
ظلت منذ العام 2014م تعاني وهي تحتضن معسكر طيبة الحسناب الذي كان يتبع لهيئة العمليات، وكانت هي الحاضنة لأول قوة من قوات حميدتي في الحدود الجنوبية لمدينة الخرطوم، في العام 2014م.. تعاني تريعة البجا ومن حولها وحيدون من عمليات الاستيطان المسلح التي يعاني منها البعض الآن..
بعد اخماد هبة سبتمبر 2013م، التي لجأ خلالها البشير لطلب الحماية من حميدتي، ليسانده في قمع الغضب الذي انطلق حينها.. بعدها حرك قائد الدعم السريع، والذي كان يتبع لهيئة العمليات حينها، قواته المرتكزة بمنطقة كردفان، تحت ضيافة مولانا احمد هارون والي ولاية شمال كردفان حينها، ونائب رئيس المؤتمر الوطني في ذلك الوقت، ويقال انه نتيجة للخلاف بين مولانا وحميدتي.. دخلت قواته الخرطوم لتستقر في الجزء الذي خصص لها داخل معسكر هيئة العمليات بطيبة الحسناب، والذي يفصل بينه وبين تريعة البجا طريق جبل أولياء الخرطوم..
منذ الساعة العاشرة صباحاً في اليوم الأول للحرب، شهدت تريعة البجا كل صور المعاناة التي ظل يتعرض لها الشعب السوداني خلال العام ونصف التي مرت من عمر المعاناة، انطلق القصف الجوي بطائرة هليكوبتر تتبع للقوات الجوية بطلعة جوية أعلنت للجميع بأن الفات حمادة والجايي حمادة تاني خالص.. انتظمت عمليات القصف منذ اليوم الأول، وخلال ساعات محددة، وأصوات مميزة.. اصبح الأطفال قبل مضادات الطيران يعلمون مواقيتها، تحولت أصوات القصف الجوي وتساقط رصاص المعركة العبثية التي أصبحت اشبه بالعرض الدرامي هما الأصوات المحفزة للنوم، تحولت حياة الناس منذ اليوم الأول بشكل كلي، تغيرت مواعيد النوم، وأصبح الجميع في حالة فوضى غير مفهومة..
يبدو أنه كما عانى مجتمع تريعة البجا وحيداً وخاض كل مراحل الحرب المتوقعة منذ بواكيرها، سيستعيد مجتمعها توازنه وسيستعيد نشاطه مبكراً، فقد انتظم الجميع منذ اليوم الأول في الاستنفار، ليس بالتسابق للتسلح، رغم انها لا تخلو من داعمي الخطابات التي انتظمت المجتمع السوداني والتي تمظهرت في الاصطفاف الثنائي، ولكن شهد المجتمع تغيرات كبيرة واصطف الجميع باختلافاتهم وتكاتفوا لمواجهة المشاكل وإيجاد سبل مختلفة لكيفية التعايش وامتصاص الكارثة التي اصبحوا عليها.. وتحمل تحديات المواجهة التي لا ذنب لهم فيها سوى الظروف التي قادتهم للاتسقرار في تلك المساحة المحدودة من الكرة الأرضية، والظروف الاجتماعية والسياسية التي قادت لاشتعال حرب غير منطقية بين من كانوا يظنون انهم حلفاء وشركاء قبل الحرب في تحديد مصيرهم، وبعد الحرب في تعميق معاناتهم..
انتهى بالأمس دوري الدافوري الذي جرت فعالياته وسط الحالة الغير مفهومة والمستقبل المظلم، ليتنفس مارد تريعة البجا أجواء التنافس ليستعيد الجميع لمسات جمال عبد الله، أحد أبرز اللاعبين الذين مروا على ذاكرة كرة القدم بمنطقة جبل أولياء في شبابه، وحتى وهو ربما يكون قد بلغ السبعين من عمره، لا يزال يحرص على يستمر التنافس، كل جمعة في ميدان الصديقاب، أو في أي مكان.. ومحمد صالح شريف، وعبد السلام فاروتة، اب رِدة.. وحسبو طريمبو.. حكم فاشل.. وبرضو مصر كل مرة يمسك الصفارة.. عشان هو مفروض يشارك كان دقوهو كان خلوهو..
دا كلو ما بمنعك تقيف ياتو موقف من الحاصل.. انك داير الحرب تقيف او داير الجيش يرجع ليك عرضك وأرضك ويطرد المرتزقة ديل..

انتهى دوري الدافوري اليوم الذي ساعد في تنظيم وإنجاح مباراته النهائية كل من د. جمال عبدالله وعلي احمد مصطفي ومحمد صالح شريف وابراهيم محمدزين (برشه) وحاجه السارة بت علي التي قامت باللازم والذي اعتادت القيام به طوال حياتها، وأدار اللقاء الحكام حسبو احمد حسن "طريمبو"، علاء الدين حمدنا الله، وعبدالسلام محمد صالح "فاروتة" وصبري رحمه الله في الإشراف على تحكيم مباريات الدوري كلها، بأداء جميل.. وافتقد الدوري عدد من اللاعيبن والذين كانوا مشاركين في الدوريات السابقة منذ بداية الكارثة.."

شايل كلامي دا وداير الصقو وانشرو.. لمن لقيت الكارثة الفقد ميدان الصديقاب قوائمو وركازاتو.. من زمن كانو شفع صغار بمشو يتلبو في حوش صديق ود علي ويجو يغزغزو القنايات.. ما عرفت اشيل كلامي دا اوديه وين؟
زمان كانت المصيبة واقعة واقعة.. لكن كل فترة بتصيبنا في زول واحد وبتدينا فرصة نستعيد عافيتنا ونرجى يومنا نحن زاتو لمن نبقى للناس مصيبتهم.. عشان كدا الواحد بحاول يكون هم وانزاح عشان فجيعتكم ما تكون كبيرة..
لكن المرة دي المصائب جات كلها ما خلت بي وراها ولا زول.. لا حول ولا قوة الا بالله..
الرحمة والمغفرة للجميع والصبر على ما اراد الله..

28/08/2024

نبوءة:
آخر حداد يصنع سيفاً في هذا العالم سيموت مطعوناً به.. عشان العالم دا يرتاح من الحدادين زاتو..

13/08/2024

وصية:
آخر سوداني يفك طلقة في آخر سوداني.. ما ينسى يدي روحه واحدة بي باقي تعميرة الخزنة زاتها..

عشان العالم دا يرتاح من السودانيين ومن عوارتنا دي..

19/07/2024

وكدا نقول الإمارات انتصرت في حربها ضد تنظيم الإسلاميين ولا لسع في جولة تانية؟

لأننا والله فترنا من القصة دي..

09/07/2024

الموقف الجبان والله ما حبابو..
المرة الفاتت بعد الإنقلاب، الموقف الجبان هو كان لمجرد إنه بيتماهى مع مطالب الشارع الغاضب من الخيانة القامو بيها العسكر مع حلفاءهم.. وهو نفس الموقف البناء عليه تم تقسيم الفاعلين السياسيين.. والبناء عليه اخدت تقدم موقفها من العملية السياسية وقسمتها لتلاتة مراحل زي ما قال اكتر من متحدث من بينهم بكري الجاك وقبله جعفر حسن.. وغيرهم..
#قالو إنهم في المرحلة الأولى (مفترض) يقعدو الجماعة ديل عشان يوقفو عوارتهم دي، ودا خطأ.. القصة دي دورت من يوم دخل العورا قاعة مقفولة في لجنة سداسية بدون وجود عاقلين.. يحجزوهم كان اختلفو.. ودا منطق جدودنا في حل المشكلات.. ومعالجة الأمور.. الأرعنين ما بتخليهم براهم يحلو مشكلة.. دا إذا انت فعلاً راغب في حل المشكلة..
اسع تاني انت حتمشي تقع في نفس الخطأ..
والمرحلة التانية حسب قولهم، هي انه يقعدو الناس النضيفين من د*م الشعب السوداني ويرسمو مسار العملية السياسية والفترة الانتقالية.. سموها عملية سياسية #تستثني المؤتمر الوطني والحركة الإسلامية ووجهاتها.. وصفقو وفرحو بالاتفاق دا.. (طبعاً نحن لي يوم الليلة ما عارفين منو بالضبط الواقف الموقف دا جوة تقدم؟! ومنو القبلان وعاوز يقعد مع الكيزان؟!) لكن اتخايل لي لأنه دا الموقف البرضي مننا الجماهير.. أي زول تسألو يقول ليك والله ما عارف.. لقيت روحي واقف في الموقف دا وياهو دا انا واقف.. ودا الموقف الصحيح..
وطبعاً دا كلام حسياً كدا قوي وبشبع غريزتنا في اسقاط العقوبات على الناس الهاردين فشفاشنا..
لكن منطقياً، هل الكلام دا سليم؟!!.. معيار النضافة من الــد*م شنو؟ والمؤتمر الوطني منو بالضبط الانت ما عاوز تقعد معاهو؟ وبسببه انت برتفض تقعد تسمع الأطراف الانت بتفتكر انها هي المشعللة الحرب ويدها ملطخة بد*م الشعب السوداني..
وانت بتقول انك محايد!!..
محايد لا يتخذ موقفًا علنيًا ضد أي طرف، مما يعني أنه، يجب عليك أنك ما يكون عندك أي موقف تجاه أي فاعل او ما فاعل في الحرب دي.. لأنه بمجرد ما بقى عندك موقف تجاه طرف من الأطراف حتنتقل من مربع الحياد..
ممكن تخش مربع حمدوك، الإنحياز لقضايا شعبكم.. وشعبكم دا دايركم تقيف موقفكم دا ولا عندو راي تاني عليمك الله..
والمرحلة التالتة حسب قولهم برضو، هي مرحلة مناقشة القضايا الدستورية والتي لا يحق لأي أحد أن يحرم منها سوداني من المشاركة.. ودي المرحلة البختو فيها يدهم في الأيادي الملطخة بالـد. مــاء.. بعد يغسلوها طبعاً أو يقطعـ**وها أو يسوو فيها الدايرنو خلال الفترة الإنتقالية..
وبعد دا كلو.. دايرين الكيزان يوقفو الحرب.. الأشعلوها والمشاركين فيها.. وببذلو الغالي والنفيس في سبيل انهم ينتصرو.. ويقبلو عليكم..
ومافي زول بقدر ينكر..
وفي ناس بموتو ساااااي وبياكلو في كجانص كجانص.. دا كان لقو ليها بصلة..
الناس تكون منطقية وأمينة وشفافة.. وأهم حاجة شفافة دي..
ياهم ديل الكيزان كان تحت يدكم.. ويدهم ملطخة بد. م الشعب السوداني.. وياهم ديل اسع بتلاقوهم وبكرة حتلاقوهم..
كان بعد مية سنة حتلاقوهم..
الملاقى دي طالما باقية باقية.. كان بعد مرحلة كان بعد عشرة مراحل.. طيب ياخي اتلاقو.. وبردو قلب الشعب السوداني دا.. وتاني امشو تمو شكلتكم.. وامشو في باقي المراحل علي راحتكم..
نحن زاتنا نكون ارتحنا شوية عشان نفضى للمظاهرات..
عيب ياخي.. دايرين الشعب دا يصبر ليكم لمتين لغاية ما تتمو مراحلكم دي إن شاء الله؟!!

الموقف الجبان الآن هو موقف #تستثني كان رضيتو كان ابيتو.. واعملو الدايرنو..

28/05/2024

الدعوة الاتقدم بيها الهادي إدريس، والمناقشات جوة (تقدم) الاتفتحت بخصوص تشكيل حكومة..
أي خطوة في الوقت دا من أي جهة في السودان بإعلان حكومة، بغض النظر عن منو الطرف دا.. دي حتكون أول خطوة في مسار تفتيت السودان، وتقسيمه..
السؤال المفترض يجاوب عليه الداعمين للمقترح، بخلاف سلطة بعض الجماهير (الممكن) تدعم الفكرة، لأنه بالتأكيد فكرة زي دي هي فكرة خلافية من أساسها.. السؤال: من وين حتجيب القوة الحتقدر تنفذ بيها قرارات الحكومة الحتعلنها؟!!
حسب ما هو متوقع.. ممكن الناس تتجه في تشكيل حكومة، وتقعد تتشاكل وتحفر وتتآمر تلاتة اربعة شهور كدا، وبعد تنتهي الصراعات الما معروف اذا كان حتنتهي ولا لأ.. لكن في الواقع حتتشكل الحكومة.. وفي الواقع حيطلع حميدتي بي بيان بيعلن فيه اعترافه بي الحكومة الحتتشكل دي.. لأنه ببساطة دا خط الجنجويد.. إلا إذا كان الناس عايزة تتغافل النقطة دي.. طيب هل انت عندك ضمانات إنك تعلن حكومتك دي وتلاقي قبول من الأطراف المتحاربة؟!
اعلان حكومة من أي جهة بيعني انه ينقل الصراع لمربع جديد.. والمربع دا بكل أسف هو مربع تفكيك السودان.. ما عارف إذا كان الدكتور الهادي إدريس مدرك للحاجة دي، وأتمنى إنه يكون غير مدرك، لأنه انت كدا مش بس تكون أثبت صحة الإدعاءات الملاحقة القوى المدنية بإنها الحاضنة السياسية للدعم السريع.. لكن إنت بتمشي لنقطة أبعد وهي إنك بتأكد إنه انت والدعم السريع بتتشاركوا المشروع نفسه.. وبكدا إنت بتكون نجحت في انك تنسف كل جهود التقارب بين القوى الديمقراطية إذا كان مدنية أو حركات مسلحة..

طبعاً من ناحية المبدأ، مافي ما يمنع إنه القوى الديمقراطية المدنية من إنها تتشارك الجنجويد كقوة مسلحة ذات المشروع السياسي.. باعتبار إنه القوى المدنية اتشاركت قوات مسلحة تانية مشاريع سياسية.. ودي حقيقة وواقع ظلينا نعيشه كسودانيين من زمان.. وتقريباً أي تحالف سياسي سوداني إذا كان تحالف معارض او تحالف سلطة.. من تحالف عبود ونميري والبشير والتجمع الوطني المعارض ونداء السودان وقوى الإجماع وقوى الحرية والتغيير وتحالف انقلاب 25 اكتوبر وأخيراً تقدم نفسها.. كلها تحالفات بين قوى مدنية وقوات مسلحة.. فوفق المنطق دا ما في ما يمنع إنه تقدم تتشارك الدعم السريع مشروع سياسي..
لكن هل المنهج والتجربة القدمها الجنجويد بتشبه المنهج والتجارب القدمتها القوى المسلحة التانية؟ وهل تقدم عندها الجرأة والشجاعة البتخليها تطرح مشروع تحالف مع الدعم السريع، بنفس الجرأة البتطرح بيها مشروع إعلان حكومة؟

بالإضافة لإنه المقترح صمت عن إنه يوضح آليات إعلان الحكومة دي، هل حتعلن حكومة منفردة ولا حيكون في تفاهمات مسبقة مع المتصارعين؟

الخطوة دي كان ممكن تكون منطقية لو كانت في 13 أبريل او 12 أبريل 2023م، إذا اتجهت القوى المدنية بإعلان (إنقلاب مدني) على السلطة، بمبرر إنه الطرفين بيفتقدوا للمسئولية البتأهلهم لإنهم يديروا السودان ويحافظوا على وحدته ويوفرو ليه الأمن.. في الوقت داك الخطوة دي كان ممكن تلقى تأييد من كل السودانيين الحريصين على استقرار السودان وحتلقى دعم من المجتمع الإقليمي والدولي ومن كل الناس الداعمين للديمقراطية والرافضين للدكتاتورية والحكم العسكري.. لكن بما إنك جبنت من إنك تقوم بالخطوة دي في الوقت الكنت جاري من صالون لي افطار رمضاني ومن مكتب لي مكتب عشان تمنع نشوب الحرب.. وفضلت إنك تتفرج على العساكر وهم بيغامروا بمصير الشعب السوداني كله، ومش كدا بس.. انت فضلت قاعد جوة السلطة البتستهر بمصير الدولة السودانية.. يبقى ما قدامك غير إنك تواصل تتفرج كدا لمن الحرب تقيف وممكن في الوقت دا الظروف تكون مختلفة تخليك تقدر تمشي في خطوتك دي بدون ما تساهم في تفتيت السودان..

أما موضوع إنه الدافع وراء المقترح دا إنك داير الشعب السوداني بالخطوة دي يحافظ على وحدة البلاد، إتخايلي دا كلام بيقع ضمن (البكج) ساي.. ما عنده أي فلسفة ممكن تخلي اعلان أي حكومة بدون إتفاق بين كل الأطراف بحافظ على وحدة أي بلد في الدنيا دي.. إلا يكون السودان هو الحيكسر المنطق.. لكن طبعاً السودانيين دي اتوقع منهم أي حاجة..
شعب الله المختلف عن كل الشعوب

https://www.facebook.com/StopWar249/posts/pfbid02RGrzx44wUuH14grBkUCTF84S2uWRCBn9wfiiqciBMYFFqgp9KtXQdQhKxfEv7ChJl

الهادي إدريس: يدعو الشعب السوداني لتشكيل حكومة مدنية يحافظ من خلالها على وحدة وسلام السودان..
ــــــــــــــــــــــــــــــــــــــــــــــــــ
تقيف بس - أديس أبابا
27 مايو 2024م

طالب الدكتور الهادي أدريس عضو الهيئة القيادية لتقدم ورئيس الجبهة الثورية السودانية وعضو مجلس السيادة الانتقالي في خطابه في الجلسة الافتتاحية للمؤتمر التأسيسي للقوى الديمقراطية المدنية من المجتمعين الإقليمي والدولي عدم الاعتراف بحكومة بورتسودان، وطلب من الشعب السوداني سحب الشرعية من هذه الحكومة والذهاب في اتجاه تشكيل حكومته المدنية التي تراعي مصالحه وتحافظ على وحدة البلاد..

تابعونا على منصة تقيف بس لمعرفة مزيد من المعلومات حول مجريات المؤتمر التأسيسي للقوى الديمقراطية المدنية..

ـــــــــــــــــــــــــــــــــــــــــــ



#تقدم

20/05/2024

محمد صديق دا نموذج مفترض نعرف منه إنه مافي زول واقف مع زول في القصة دي.. كل زول بيختار في كل موقف يلاقيه في الحياة دي ناصية بيقيف فيها.. بعد داك بشوف الآخرين الإختاروا يقيفوا في جمبتو الاختارها دي منو..
في 8 رمضان تقريباً 13 مايو 2019م حوالي الساعة 2 صباحاً كدا، كنا قاعدين في اتجاهات التدريب المهني بنشرب في قهوة بعد ما الناس بدت تقعد وتحاول تهدى بعد المجزرة الحصلت قدام كبري الحديد، كان مع ست الشاي ضابط في الاستخبارات نقيب تقريباً، واتفتح الموضوع بتاع "الجنجويد يتحل" وبقينا بنتكلم انا ومعاي شباب وكل زول بقول البريحو.. الضابط كان لابس ملكي زينا لكن لمن اتدخل في الموضوع طوالي قدم لينا نفسو بي رتبتو..
في نص النقاش قام قال ليه كلام، انا من خلاله قدرت اتعامل مع الطريقة الاتعامل بيها الجيش كمؤسسة مع المواضيع بما فيها فض الإعتصام.. الزول دا في النقاش قال لي انتو مش دايرين تحلو الدعم السريع؟ تمام.. أها حيتحل كيف؟ ومنو البحلو.. قال لي الجيش لو قرر ينفذ الطلب دا.. معناها حيطلع تعليمات لكل وحداته.. بيعلمها فيها بالقرار.. لو القوة قبلت تمام.. لو ما قبلت بالقرار بتتعامل معاها تعامل عسكري ما عندو أي علاقة بفلسفة وسياسة.. ودا طبعاً ما حنقوم نجي نلقط الدعامة نسوقهم الخلا عشان نحسمهم.. حتكون حرب مدن الناس دينا حيطلع.. قال لي لو انتو مستعدين تتحملو التكلفة بتاعة الموضوع دا طوالي امشو اجبروا الجيش يصدر التعليمات دي.. واقعدوا اتفرجو.. يبقى إذاً الموضوع دا ما عندو أي علاقة بي كرامة.. الكرامة جات ضمن ما يترتب عليه..
على الأساس دا في سودانيين كتار جداً قاعدين جوة الجيش وشايفين البحصل وعندهم تقييمهم الشخصي وبياخدوا قرارات بناء على تحليلاتهم وبفتكروا إنه القرار دا هو المنطقي.. حتى البمسك ليه أسير وبيكفتو ويهينو ويفش فيه غله، وبفضي فيه أمراضه النفسية وعقده كلها.. عشان هو عسكري عنده مبدأ إنه يسند المؤسسة العسكرية الساهم في وقت ما في بناءها.. وهو كل المواقف الأخدها في حياته بيشوف محل الحق وين وبيقيف.. ما عندو شغلة بالواقف معاهو في الصف دا منو.. ممكن بكرة يكون واقف معاك انت زاتك لو الحرب دي وقفت.. واتغيرت الظروف.. بعدين زول انت لا بتعرفو لا بعرفك.. لماكم الميدان دا.. كان عدو كان حليف.. وانت غلبتو والموضوع انتهى.. دا بني آدم.. ما كلاش ولا مصيبة من المصايب البتشيلوها بتدمرو بيها في البلد.. دي زي حركات توم اند جيري لمن توم يشيل جيري ويربطو ويدردمو ويدخلو جوة المدفع بتاع السفينة ويمشي يولع البتاعة ديك.. ياخ معقولة لكن؟ انت عايز تهينو عشان تهزم العدو بتاعك مثلاً!عشان كدا صورت العملية دي ونشرتها؟! ولا هو زاتو الواحد بقدر تاني يعيش كيف في نص ناس بتاكل في بعض حرفياً.. وطبعاً حتى الإحتفاء والقبول بالحاجة دي والاستمرار بعديها في نفس المسار دا اسوأ من الفعل نفسه..
الفرصة الوحيدة إنه يعلن الطرفين هزيمتهم.. وهزيمة السودان كله.. ويوقفوا المهازل دي..

12/02/2023

بيان تحالف قوى وتيارات مؤتمر البجا
#السودان