22/12/2025
በሶማሊያ የሁለቱ የኢትዮጵያ ወታደሮች የፈጸሙት ጀብዱ በአራት ተከታታይ ክፍል በመክፈል እንደሚከተለው ይቀርባል ።
ታሪኩ የሚጀምረው በአንድ ጨለማ ሌሊት በሶማሊያ ድንበር አቅራቢያ ነው።
ክፍል ፩ (1) ፦ ጥቁሩ ሌሊት
በደቡባዊ ሶማሊያ በሂርሸበሌ ክልል የሚገኘው "የሃልገን " በረሃ እንደ ምጣድ ይጋላል። ፀሐይ ስትጠልቅ የነበረው ቀይ ወጋገን አሁን ቦታውን ለጭለማ ሰጥቷል። ጭለማው ግን ሰላም አልነበረም፤ ይልቁንም የሞት ሽታን አርግዟል።
ሻምበል ካሳሁን በአሸዋማው ጉድጓድ ውስጥ ተደፍቶ በሌሊት መመልከቻ መነፅሩ አካባቢውን ይቃኛል። አቧራ የለበሰው የደንብ ልብሱ ከበረሃው አፈር ጋር ተዋህዷል። ከጎኑ መቶ አለቃ አማኑኤል የ"ድራጉኖቭ" ስናይፐር ጠመንጃውን ደግኖ ትንፋሹን ዋጥ አድርጓል።
"አይታዩም ሻምበል..." አለ አማኑኤል በሹክሹክታ። ድምፁ ውስጥ የንዴትና የጭንቀት ስሜት ይንፀባረቃል።
ካሳሁን አልመለሰለትም። የልቡ ትርታ ግን እንደ ከበሮ ይደልቃል። ከአንድ ሰዓት በፊት ከአልሸባብ የደረሰባቸው ድንገተኛ ጥቃት ካምፓቸውን አናውጦታል። በዚያ ግርግር መሃል ነበር በድንገት የሬዲዮ መገናኛ ባለሙያው ፲/አለቃ ዮናስ በጠላት ታግተቶ የተወሰደው። ዮናስ የቡድኑ "ጆሮ" ብቻ አልነበረም፤ ለካሳሁን እንደ ታናሽ ወንድም፣ ለአማኑኤል ደግሞ የልጅነት ጓደኛው ነበር።
"ወደ ሰሜን ምስራቅ አቅጣጫ ነው የወሰዱት፣" አለ ካሳሁን በመጨረሻ። መነፅሩን አውልቆ አይኑን አሻሸ። "ቆይ ቆይ... ያንን ተመልከት!"
በሩቅ፣ ከ ተራራ ስር አንዲት ደብዛዛ ብርሃን ብልጭ ብላ ጠፋች። የሞተር ድምፅ በለሆሳስ ይሰማል። የአልሸባብ ታጣቂዎች ታጋቹን ይዘው ወደ ምሽጋቸው እየገቡ እንደሆነ ግልጽ ነው።
"ሻምበል፣ ትዕዛዝ አንጠብቅም?" ጠየቀ አማኑኤል፤ ጣቱ የጠመንጃውን ምላጭ እየዳሰሰ።
ካሳሁን ወደ ሰማይ አየ። ከዋክብቱ በበረሃው ሰማይ ላይ ደምቀው ይታያሉ። "ከመቀመጫችን ትዕዛዝ እስኪመጣ ዮናስን ድንበር ያሻግሩታል። አንዴ 'ጂልብ' ከገቡ ደግሞ መልሰን አናገኘውም።"
"ታዲያ ምን እናድርግ?"
ካሳሁን ቀና ብሎ አማኑኤልን በአይኑ ኩራት ተመለከተው። "እኛ የምንሄደው ለጦርነት ሳይሆን ለነፍስ አድን ነው። ሬዲዮህን አጥፋው። ከአሁን በኋላ የምንመራው በልባችን ትርታ ብቻ ነው።"
አማኑኤል ፈገግ አለ። ያ የሞትና የህይወት ፈገግታ። "ታጥቄያለሁ ሻምበል!"
ሁለቱ ጀግኖች አፈሙዛቸውን ወደ ጨለማው አቅጣጫ አዙረው ከአሸዋው ጉድጓድ ወጡ። ከኋላቸው ያለው የኢትዮጵያ ሰላም አስከባሪ ጦር ሰፈር እየራቀ ሄደ። በፊታቸው ያለው ግን የማይታወቅ አደጋ፣ የጠላት ምሽግ እና የጓደኛቸው ህይወት ነው።
በዚያ ጥቁር ሌሊት፣ ሁለት ወታደሮች የጓደኝነታቸውን ቃል ኪዳን በደማቸው ሊያትሙ ከአባቶቻቸው የወረሱትን አይበገሬነት ለመድገም ጓዳቸው ወደተወሰደበት አቅጣጫ ጉዞ ጀመሩ።
ክፍል ሁለት ይቀጥላል.....✍️
@በእንዳልክ ሳለሁ ተፈራ
