10/08/2026
Waxaa magaalada Jigjiga lagu qabtay Kulan-weynaha Wadatashiga Diyaarinta Qorshaha Sannad-Miisaaniyadeedka 2019 T.I ee lixdii maamul-magaalo ee h**e.
Kulan-weynaha oo uu soo qabanqaabiyey Xafiiska Horumarinta Magaalooyinka iyo Dhismaha DDS, waxaa ka soo qayb-galay Madaxweyne Ku-xigeenka DDS, Mudane Ibraahim Cusmaan Faarax, Wasiirka Xafiiska Horumarinta Magaalooyinka iyo Dhismaha DDS, Mudane Axmed Shukri, qaar ka mid ah hoggaaminta sare ee heer deegaan iyo masuuliyiinta lixdii maamul-magaalo ee h**e
Kulanka ayaa lagu soo bandhigay qorshaha S.M. 2019 T.I, nidaam ku shaqaynta iyo jihooyinka qorshe-tilmaameedka maamul-magaalooyinka, iyadoo xoogga la saarayo in qorshayaasha magaalooyinku noqdaan kuwo ka turjumaya baahida dhabta ah ee bulshada, korna loo qaado dakhliga gudaha, lana dhiirrigeliyo maalgashiga iyo shaqo-abuurka, si loo xaqiijiyo adeeg-bixin leh hufanaan iyo horumar la taaban karo.
Madaxweyne Ku-xigeenka DDS, Mudane Ibraahim Cusmaan Faarax, ayaa sheegay in magaalooyinku yihiin laf-dhabarta kobaca dhaqaalaha iyo xadaaradda bulshada, sidaas darteedna horumarintoodu ay tahay ahmiyadaha ugu h**eeya ee mudnaanta ay siisay xukuumadu . sidookalena taageerada magaalooyinka ay yihiin kuwo muujinaaya isbaddal la taaban karo oo ku yimaadda nolosha bulshada, tayada adeegyada iyo bilicda magaalooyinka.
Madaxweyne Ku-xigeenka ayaa sidookale sheegay in sannad-miisaaniyadeedka 2019 T.I laga doonayo maamul-magaalooyinka inay xoogga saaraan qorshayn ku dhisan natiijo sax, kobcinta dakhliga, horumarinta kaabeyaasha dhaqaalaha, nadaafadda iyo bilicda magaalooyinka, soo jiidashada maalgashadayaasha iyo fursadaha shaqo abuurka.
Dhankiisa, Wasiirka Xafiiska Horumarinta Magaalooyinka iyo Dhismaha DDS, Mudane Axmed Shukri, ayaa sheegay in sannadihii u dambeeyey horumar laga sameeyey dhinacyada maamulka, qorshaynta iyo kaabeyaasha magaalooyinka, isla markaana la sii xoojinayo qorshayaasha horumarineed ee lixdii maamul-magaalo ee h**e iyo maamul-magaalooyinka cusub.
Ugu dambayn, kulan-weynaha ayaa lagu lagu falanqeeyay qorshayaasha mudnaanta u leh sannad-miisaaniyadeedka 2019 T.I, waxaana la isla qaatay in maamul magaalooyinku yeeshaan qorshe cad, bartilmaameed la cabbiri karo iyo isla-xisaabtan joogto ah, si magaalooyinka Deegaanku u noqdaan kuwo qorshaysan, dhaqaale abuura, adeegyo tayo leh bixiya, nadiif ah, cagaaran, una diyaarsan kobaca mustaqbalka.
