31/12/2025
真係足足有一年冇響呢度寫過嘢。
其實一直我都有keep住工作，過得尚算順利，感恩行家繼續比機會。
網站短時間被hack兩次後，原本安排係暫時唔重建，等一個好得閒嘅時間先再整，但直到10月我個domain到埋期都冇再續落去，因為都涉及一筆使費，而且近年已冇乜屬於自己嘅婚禮job，keep住個網站都唔知有乜意義，於是我就直接放下，專心幫行家做嘢吧。
健康整體仍然尚可，只係隨住年紀漸大嘅小毛病開始浮現，坐骨神經、足底筋膜嘅問題開始出嚟，我已經半年冇游水，之前經常打風落雨去唔到，到有太陽嘅日子我就要工作，已經翻脹，不過我好快就會重回泳池，希望盡快減磅。
至於點解整年冇寫過嘢，我其實係有繼續寫，只不過係去咗Threads嗰邊：
https://www.threads.com/.mfcheung
呢度要特別感謝Pauline，見我呢度好耐冇update，send過message嚟問候，目前我一切安好，對仍然可以參與攝影工作覺得好滿足。
唔敢講過去一年好精彩，但大叔已無咩欲望要得到甚麼，能夠安穩渡過一年已經係唔容易嘅事，有工作就盡力做，冇嘢做就約下行家同朋友聚聚，已足夠開心。
我冇諗到咁長遠，只想繼續有機會揸機就開心，新機都買咗，代表我喺嚟緊一段時間內都係未會有停下嘅打算。
新一年，祝福大家都能平安順利
自知唔係甚麼重要人物，但有興趣的話，歡迎各位到我嘅Threads😊
