28/07/2026
ជូនក្រុមប្រឆាំងផ្កាប់មុខ សូមអានផង
ព្រះរាជសារសម្តេចព្រះ នរោត្តម-សីហនុ
ថ្ងៃទី០២ ខែកក្កដា ឆ្នាំ១៩៥៨
ជូនជនរួមជាតិខ្មែរទាំងឡាយ...
ខ្ញុំសូមជម្រាបជនរួមជាតិថា តាំងអំពីថ្ងៃដែលលោក ឧត្តមសេនីយ លន់ - នល់ មេទ័ពជាតិយើងបាននាំព័ត៌មាន អំពីស្ថានការណ៍នៅព្រំប្រទល់ដែនជាតិយើង ជាប់នឹង យៀកណាមខាងត្បូងមកឲ្យខ្ញុំ ខ្ញុំបានទទួលចាត់ចែងកិច្ចការធ្វើគ្រោងការ-ឲ្យបញ្ជាសព្វសារពើទៅក្រសួងស៊ីវិល ទាហាន និងរាជការក្រុង-ខេត្ត តាមកាតព្វកិច្ច ដែលកាលៈទេសៈតម្រូវឲ្យធ្វើ ដើម្បីការពារអាយុ ជីវិត និងឧត្តមប្រយោជន៍ជាតិយើងជាដរាប តាំងតែពីថ្ងៃនោះមក រហូតមកទល់ នឹងថ្ងៃនេះ ហើយតទៅថ្ងៃស្អែក អនាគតខាង មុខទៀត ដោយគ្មានធ្វេសប្រហែសទេ ។
ខ្ញុំធ្វើការនេះជូនជាតិ ដោយព្រះរាជបញ្ជាព្រះមហាក្សត្រ ដែលវិបត្តិរដ្ឋាភិបាល បានធ្វើមិនឲ្យព្រះអង្គមានរដ្ឋាភិបាលពេញលក្ខណៈច្បាប់ នៅក្រោមព្រះរាជឱវាទ។
ចំពោះការដែលទ័ពអាណ្ណាម(យួន)ច្រើនក្រម ចូលមកលុកលុយ ហើយមកតាំងរិទ្ធិនៅលើផែនដីយើងជាយូរថ្ងៃ ក្នុងខែត្រស្ទឹងត្រែងយើង មានមនុស្សជាតិខ្មែរខ្លះឈឺចិត្តដោយមិន
យល់ថា ហេតុអ្វី បានជាយើងមិនឲ្យទ័ពខេមរភូមិន្ទវាយតបតឬតទល់ ដើម្បីដេញកងកម្លាំងបរទេសនេះឲ្យនិរាសចាកចេញពី ដែនសីមាកម្ពុជរដ្ឋយើងទៅ? និស្សិតនៅប្រទេសបារាំង បានបន្ថែមសេចក្តីថា យើងមិនតបតយ៉ាងនេះ នាំឲ្យពិភពលោកគេប្រមាថយើងថាយើងខ្សោយ ។
ពេលនេះ ខ្ញុំសូមបញ្ជាក់ជូនកូនចៅជាទីស្នេហាជ្រាបថា បានជាខ្ញុំបានបង្គាប់ទៅកងទ័ពជាតិយើងថា ត្រូវនាំកងកម្លាំងយើងទៅត្រៀមនៅពីមុខពួកសត្រូវ តែមិនត្រូវ វាយជាមុនទេ ត្រូវចាំឲ្យវាវាយមកមុន ទើបត្រូវតយ៉ាងខ្លាំងនេះ ព្រោះខ្ញុំស្គាល់គំនិតសត្រូវច្បាស់ណាស់ មិនត្រូវបណ្តោយជាតិយើងឲ្យរត់ចូលទៅក្នុងអន្លាក់ឧបាយកល សត្រូវនោះឡើយ។
ចំពោះការដែលសត្រូវគេចូលមកតាំងរិទ្ធិនៅលើផែនដីយើងនោះ ត្រូវយើងធ្វើយ៉ាងណាកុំឲ្យបាត់ភស្តុតាងស្លាកស្នាម ដែលសត្រូវនេះចូលមករំលោភលើអធិបតេយ្យភាព បូរណភាពជាតិយើង។ ត្រូវយើងអំពាវនាវហៅអន្តរជាតិ និងបរទេសក្រៅក្របខ័ណ្ឌវិវាទខ្មែរ-យួន នេះ ឲ្យគេមកមើលឃើញឲ្យច្បាស់ លាស់នឹងភ្នែកគេ នូវកស្តុតាងស្លាកស្នាមនេះសិន ទើបក្នុងការវិវាទនេះ ប្រទេសយើងឈ្នះក្តី ឬរួចខ្លួនពីគ្រោះថ្នាក់ទុក្ខទោសធ្ងន់ ដែលសត្រូវគេចាំថ្កោលទោសបាន។
បើយើងហើយ គ្មានសេចក្តីអំណត់ ឆាប់បាត់ស្មារតី (Perdre le sang froid) ប្រតិបត្តិការវាយតបតគេវិញ ពួកយួនខាងត្បូងនេះ ដែលគេមានសម្ព័ន្ធមិត្ត-មិត្ត ភក្តិគេស្ដុកស្ដម្ភក្នុងលោកសេរីច្រើន ម៉្លេះនេះ គេអាចនឹងចោទយើង បង្កាច់បង្ខូចយើងដោយងាយបាន ដោយគេថាទ័ពយើងទេដែលចូលទៅលុកលុយដែនដីគេមុន។ ចូលទៅដោយគេមុន ហើយគេក៏អត់ធ្មត់ពុំបាន ក៏គេសូមតបវិញទៅ។
បើជាខ្មែរយើង និងយួនខាងត្បូងនេះ ចូលប្រឡូកវាយកាប់ច្បាំងគ្នាពេញបន្ទុកទៅ មុននឹងសាក្សីអាជ្ញាកណ្តាលខាងអន្តរជាតិនិងបរទេស គេបានទៅសង្កេតស្ថានភាព នៃទីកន្លែងដែនដីយើង ដែលយួនខាងត្បូងចូលមកជិះជាន់ដោយទំនើងចិត្តគេនេះ តើយើងនៅមានសល់ភស្តុតាងអ្វី នឹងបង្ហាញទៅចៅក្រមសហប្រជាជាតិ ដែលគេនឹងមកកាត់សេចក្តី ជម្រះក្តីវិវាទយើងនេះ ដើម្បីឲ្យគេជឿថា យើងជាជាតិស្លូតត្រង់ពិត ស្រឡាញ់សន្តិភាព ពិត?
ព្រោះយើង ដែលបានជ្រើសរើសយកធម៌អព្យាក្រឹតមកកាន់នេះ យើងគ្មានសម្ព័ន្ធមិត្តដូចយួនទេ ដែលគេមានមហាប្រទេស ហៅ ថា លោកសេរីទាំងអស់កាន់ជើងគេ ចាំតែឲ្យគេត្រូវ ហើយចាំតែឲ្យយើងខុស ដើម្បីរំលាយអព្យាក្រឹតរបស់ខ្មែរយើង ដែលគេពុំអាចអត់ទោសឲ្យយើងបាន ដែលយើងហ៊ានប្រកាសអព្យាក្រឹតដាក់មុខគេនេះ។
ដែលខ្ញុំគិតអំពីរឿងនេះតាំងពីថ្ងៃ ដែលបានទទួលដំណឹងអកុសលថា ទ័ពយួនចូលស្រុកនេះ ដល់ក្រោយដែលលោកនាយកស៊ឹម-វ៉ានិងព្រះមហាក្សត្រ ព្រះអង្គប្រកាសប្រាប់ និងប្តឹងសាកលលោក ប្រជាជាតិនានា ក៏ឃើញ ថា ព្រឹត្តិការណ៍ចេញសាយសុះលើពិភព លោក ដូចជាខ្ញុំស្មានអ៊ីចឹង ទាំងអស់។
یពួកយួនខាងត្បូងគេឲ្យកាសែត និងវិទ្ នៃប្រទេសធំៗខាងលោកសេរីស្រែក ហើយផ្សាយឲ្យពិភពលោកជឿថា ខ្មែរយើងនេះជាជាតិសាសន៍ពូកែបោកប្រាស់ ពូកែបង្កាច់កេរ្តិ៍ត្រកូលគេណាស់ ចូលចិត្តស្រែកទ្រហោយំក្តែងៗ ចេះតែប្តឹងផ្តល់ថាគេធ្វើបាបខ្លួន គេលួចខ្លួន គេវាយខ្លួន ប៉ុន្តែ តាមការពិតគឺខ្លួននេះវិញទេ ដែលដើរឆាឆៅធ្វើបាបរំលោភ ទៅលើគេ ฯ
យួនខាងត្បូងចោទយើងថា យើងនេះទទួលឧបត្ថម្ភពួកយួនវៀតកុង ហ្វាហាវ ប៊ិញ-ស្វៀង ។ល។ ឲ្យមានបន្ទាយ មានអាហារ មានសាស្ត្រាវុធ មានជីវភាពលូតលាស់ធំធាត់ សម្រាប់បញ្ជូនឲ្យទៅវាយគេ។ គេចោទទៀតថា យើងនេះបានឲ្យទ័ពខេមរភូមិន្ទ ចូលទៅលុកលុយដែនដីគេជាង ៤០ដង។
ក្នុងរឿងស្ទឹងត្រែងក្រោយនេះទៀត គេថាយើងបានឲ្យកងខេមរភូមិន្ទ ចូលទៅពង្រត់ពួកយួនជាប់គុក៩០នាក់ពីគុក Pleiku ហើយមានទាំងឲ្យរទេះឡានទាហានធំៗ GMC ចាំបញ្ជិះ(ដឹក)អ្នកជាប់គុក ដែលសត្រូវនឹងរាជការគេនេះចូលមកនៅជ្រកនៅក្នុងរាជអា ណាចក្រយើងផង។ ពិតមែនថា លោកសេរី បើខ្លួនមានគតិយុត្តិធម៌ ពុំអាចជឿនូវសេចក្តីចោទបង្កាច់ដោយឧក្រិដ្ឋនេះបាន ព្រោះ៖ ៖
ខ១- គេដឹងច្បាស់ថា យើងជាប្រទេសក្រខ្សត់ ដោយប្រទេសមហាសេដ្ឋី គេពុំបានយកលុយមកជះឲ្យយើង ដូចប្រទេស ដែលចូលដៃនឹងគេទេ។ ប្រទេសយើងខ្សោយដោយពលរដ្ឋមានចំនួនតែ៥លាននាក់ យ៉ាងច្រើន។ កងទ័ពមានតែ២៧.០០០នាក់ ហើយប្រទេសយួនខាងត្បូង មានពលរដ្ឋ ជាង១២លាននាក់ ហើយមានកងទ័ព ២០០.០០០នាក់ ប្រទេសសៀមមានពលរដ្ឋ ១៨លាននាក់ មានកងយោធា ខ្លាំងពូកែដូចយួនដែរ។ ប្រទេសយើងមានយន្តហោះប្រហែល៣០ ហើយតូចផង ចាស់ផង ប្រទេសយួន ឬសៀមមានយន្តហោះរាប់រយ ហើយមានដល់ទៅយន្តហោះប្រតិកម្មពន្លឺ (à réaction)ផង តើខ្មែរយើងឯណា ហ៊ានទៅរករឿងនឹងគេ ហ៊ានចូលវាយគេមុន ថែមទាំងខ្លួនអព្យាក្រិត អត់សម្ព័ន្ធមិត្តទៀតផងនោះ?
ខ២- បើនិយាយថា ដោយយើងដឹងខ្លួនថា យើងខ្សោយនេះហើយ បានជាយើងឧបត្ថម្ភ ហ្វា - ហាវ វៀក-កុង ប៊ិញ-ស្វៀង ឲ្យជួយធ្វើបាបគេ ពាក្យនេះក៏បរទេសគេស្គាល់ចិត្តថ្លើម ស្គាល់សាវតារ ស្គាល់ជីវភាព បច្ចុប្បន្នរបស់ខ្មែរ ពុំអាចជឿបាន ព្រោះដូចជាខ្ញុំបានប្រាប់លោកឯកអគ្គរដ្ឋទូតអាមេរិកាំងពីម្សិលមួយថ្ងៃ (២៩-៦-៥៨) នៅមុខសម្តេចចៅហ៊្វា ប៉ែន-នុត អីចឹងដែរ កើតមកជាខ្មែរ រមែងតែខ្លាចរអាយ៉ាងខ្លាំង នូវជាតិសាសន៍យួន។ មិនដែលមានខ្មែរណា ហ៊ានទៅឃុបឃិតចូលគំនិតនឹងយួនទេ ព្រោះដឹងច្បាស់ណាស់ទៅហើយថា ពួកខាងជើង និងពួកខាងត្បូងដូចគ្នា គឺដូចមួយដំប នឹង បួន (៤) ។ លោកសេរី បើមានធម៌សច្ចៈ អាចនឹងអាណិតយើង រកយុត្តិធម៌ឲ្យយើងកើត តែលោកសេរីគេខ្លាចខាតឧត្តមប្រយោជន៍គេ គេពុំរវល់នឹងយើងឡើយ ។
ដើម្បីពន្លិចយើងជាស្ថាពរ រដ្ឋាភិបាលយួនខាងត្បូង ហ៊ានចោទយើងនៅមុខពិភព លោកថា ប្រទេសខ្មែរកាន់អព្យាក្រិតក្លែងក្លាយ ពុំបរិសុទ្ធទេ ព្រោះបានចិញ្ចឹមយួន ម្ខាង ដើម្បីប្រឆាំងលទ្ធិលោក ង៉ោ-ឌិញ-យៀម (NGO-DINH DIEM)។
ខ្ញុំសូមឆ្លើយតបថា ខ្មែរយើងស្រឡាញ់សុខសន្តិភាព ស្មើនឹងឯករាជ្យរបស់ខ្លួន ហើយជឿធម៌ព្រះពុទ្ធដោយពិតប្រាកដ ដូច្នេះមិនដែលហ៊ានប្រព្រឹត្តអំពើជ្រៀតជ្រែក ក្នុងលទ្ធិ និងជីវភាពរបស់ប្រទេសដទៃទេ។ សព្វថ្ងៃនេះ យើងវេទនាណាស់ទៅហើយ នឹងការជ្រៀតជ្រែករបស់បរទេស តើយើងមានពេល ឬមធ្យោបាយណា ជ្រៀតជ្រែកគេវិញនោះ?
(យុវសន្តិភាព)
