26/08/2026
វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាស្រុក ឆ្នាំ២០២៦
___
នាព្រឹកថ្ងៃពុធ ១៣កើត ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៦ ខែសីហា ឆ្នាំ២០២៦ នេះ លោក យង់ យឺន ប្រធានក្រុមប្រឹក្សាស្រុកថ្មពួក និង លោក រ័ត្ន ដាសុីណង់ អភិបាល នៃគណៈអភិបាលស្រុកថ្មពួក បានអញ្ជើញចូលរួមជាអធិបតីភាពក្នុង «វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាស្រុកថ្មពួក ឆ្នាំ២០២៦»។
វេទិកាផ្សព្វផ្សាយ និងស្តាប់កង្វល់ពលរដ្ឋនាព្រឹកនេះ ត្រូវបានប្រារព្ធធ្វើឡើងនៅក្នុងបរិវេណវត្តរស្មីសាមគ្គីស្តៅ ដោយមានការអញ្ជើញចូលរួមពីសំណាក់ លោក-លោកស្រីសមាជិកក្រុមប្រឹក្សាស្រុក, លោក-លោកស្រីអភិបាលរងស្រុក, លោកនាយក-នាយករងរដ្ឋបាល, ថ្នាក់ដឹកនាំការិយាល័យ អង្គភាពជំនាញជុំវិញស្រុក, ក្រុមប្រឹក្សាឃុំ, អាជ្ញាធរមូលដ្ឋានភូមិ, តំណាងអង្គភាពពាក់ព័ន្ធ ព្រមទាំងបងប្អូនប្រជាពលរដ្ឋមកពីឃុំភូមិថ្មី និងឃុំគោកកឋិនយ៉ាងច្រើនកុះករ។
នៅក្នុងអង្គវេទិកា ថ្នាក់ដឹកនាំរដ្ឋបាលស្រុកថ្មពួក បានធ្វើការផ្សព្វផ្សាយយ៉ាងលម្អិតជូនប្រជាពលរដ្ឋ នូវរាល់សមិទ្ធផលរូបវន្ត វឌ្ឍនភាពការងារ និងលទ្ធផលបច្ចេកទេសដែលរដ្ឋបាលស្រុកសម្រេចបាននាពេលកន្លងមក ដើមី្បឆ្លុះបញ្ចាំងពីតម្លាភាព និងគណនេយ្យភាពការងាររបស់រដ្ឋបាលថ្នាក់ក្រោមជាតិ។ អង្គវេទិកាបានដំណើរការទៅប្រកបដោយបរិយាកាសស្និទ្ធស្នាល បើកចំហ និងស្មារតីទទួលខុសត្រូវខ្ពស់ ដោយបងប្អូនប្រជាពលរដ្ឋបានចូលរួមផ្តល់មតិយោបល់ និងលើកឡើងនូវរាល់សំណើ សំណូមពរចំពោះមុខយ៉ាងផុសផុល ផ្តោតលើការផ្តល់សេវាសាធារណៈ សន្តិសុខសណ្តាប់ធ្នាប់ បរិស្ថានអនាម័យ និងតម្រូវការហេដ្ឋារចនាសម្ព័ន្ធក្នុងមូលដ្ឋាន។ រាល់មតិយោបល់ និងក្តីកង្វល់របស់ពលរដ្ឋ ត្រូវបាន លោកប្រធានក្រុមប្រឹក្សាស្រុក និងលោកអភិបាលស្រុក ព្រមទាំងការិយាល័យជំនាញ ធ្វើការបកស្រាយ ពន្យល់ និងឆ្លើយតបទៅតាមសមត្ថកិច្ចភ្លាមៗ ចំណែកឯសំណើដែលសេសសល់ ត្រូវបានកត់ត្រាទទួលយកទៅពិនិត្យ ពិភាក្សា ដើមី្បដាក់បញ្ចូលទៅក្នុងផែនការ និងកម្មវិធីវិនិយោគអភិវឌ្ឍន៍ស្រុកសម្រាប់ឆ្នាំបន្ទាប់។
អង្គវេទិកាផ្សព្វផ្សាយ និងពិគ្រោះយោបល់នៅបរិវេណវត្តរស្មីសាមគ្គីស្តៅ បានបញ្ចប់ទៅប្រកបដោយជោគជ័យ និងទទួលបានលទ្ធផលផ្លែផ្កាយ៉ាងត្រចះត្រចង់ ស្របតាមគោលបំណងដែលបានគ្រោងទុក ក្នុងការបង្កើនភាពជិតស្និទ្ធ និងជំនឿចិត្តរវាងអាជ្ញាធរ និងប្រជាពលរដ្ឋម្ចាស់ស្រុក៕
