03/06/2026
(بيان من مكونات فريق نسور إبالولن)
أولاً: كنوجهو التحية لكل ولاد دوار إبالولن، نسور و اتحاد وشباب... حيت فاللخر الدم واحد
ثانياً: كتوصلنا بزاف ديال الأسئلة والتعليقات: علاش رجعتو لاسم "نسور إبالولن" من بعد تجربة "شباب إبالولن" العام اللي فات؟
الجواب بكل وضوح واحترام
1. احتراماً للتاريخ:
السمية ديال "النسور" ما شي حروف كنلصقوها على التوني. هادي *هوية* تكتبات بالعرق فـ 2021 و 2022 كيشهدو أن الدوار فيه رجال. ما يمكنش نطويو صفحة المجد ونبداو من زيرو، والتاريخ ديالنا كيطلب منا نكملو المسيرة.
2. احتراماً للجمهور
الناس فالدوار، وفجميع المناطق، كيعرفونا بـ"النسور". وكيفرحو بها ملي كنربحو. ما من حقناش نبدلو ليهم الاسم اللي حبوه وفرحو بيه.
3. احتراماً للواقع:
العام اللي فات درنا محاولة شريفة نجمعو فيها لعابة الدوار كاملين تحت اسم "شباب إبالولن"، وكنشكرو كل واحد لعب بقلبو. ولكن الكرة ما كتعترفش بالنوايا، كتعترف بالنتائج. وتقصينا.
واليوم، بنفس اللعابة تقريباً ولكن بروح "النسور" اللي كتعطي الهيبة والتيقة، رانا فـ*نصف النهائي. الوصفة الناجحة ما كنبدلوهاش.
ثالثاً: رسالة للعقول الراقية ماشي لشلاهبية
حنا ما رجعناش نفرقو الدوار. بالعكس، رجعنا نوحدوه تحت الراية اللي جابت ليه الفرحة. *الباب محلول* لأي ولد من إبالولن باغي يلبس الأبيض والبرتقالي ويدافع على الشعار. المعيار الوحيد عندنا هو: شكون يموت على التوني؟
رابعاً: التركيز ديالنا دابا
ما كيهمناش اللي كيقول علاش بدلتوا السمية. كيهمنا نبدلو الكاس من الخزانة القديمة للخزانة الجديدة.
هدفنا واضح: اللقب الثالث.
باش ملي يسولو على إبالولن، يقولو: "آه، الدوار اللي فيه النسور، داك الفريق اللي ما كيلعبش غير باش يشارك... كيلعب باش يحكم".
عاش دوار إبالولن، وعاشو النسور 🦅
