16/04/2026
پریس ریلیز ترجمان سوشل ویلفیئر سوسائٹی رجسٹرڈ پسرور (الماس بیگ پسروری)
سوشل ویلفیئر سوسائٹی رجسٹرڈ پسرور کا مثالی کردار، ڈائریکٹر سوشل ویلفیئر سیالکوٹ کا دورہ اور شاندار الفاظ میں خراجِ تحسین
پسرور (نمائندہ خصوصی)ڈائریکٹر سوشل ویلفیئر اینڈ بیت المال ڈیپارٹمنٹ سیالکوٹ محمد شریف گھمن نے اسسٹنٹ ڈائریکٹر سوشل ویلفیئر ڈیپارٹمنٹ پسرور سدرہ سلطانہ کے ہمراہ سوشل ویلفیئر سوسائٹی رجسٹرڈ پسرور کا خصوصی دورہ کیا آفس آمد پر سوسائٹی کی ٹیم نے معزز مہمانوں کا پرتپاک استقبال کیا اور ان کی آمد کو اپنے لیے اعزاز قرار دیا۔ اس موقع پر سوسائٹی کی جانب سے اپنی کارکردگی پر مبنی تفصیلی پراگریس رپورٹ پیش کی گئی، جس میں جاری فلاحی منصوبوں، مستحق افراد کی معاونت اور معاشرتی بہتری کے لیے کی جانے والی کاوشوں پر روشنی ڈالی گئی۔ مزید برآں مستقبل کے منصوبہ جات اور نئے فلاحی اقدامات کے حوالے سے جامع بریفنگ بھی دی گئی۔ڈائریکٹر سوشل ویلفیئر سیالکوٹ محمد شریف گھمن نے سوسائٹی کی مثالی کارکردگی کو سراہتے ہوئے کہا کہ ایسے ادارے معاشرے میں امید کی کرن ہیں جو خاموشی سے انسانیت کی خدمت میں مصروف عمل ہیں۔ انہوں نے ٹیم کے جذبۂ خدمت، محنت اور لگن کو قابلِ ستائش قرار دیتے ہوئے یقین دلایا کہ محکمہ سوشل ویلفیئر ایسے فلاحی اقدامات کی ہر ممکن حوصلہ افزائی اور تعاون جاری رکھے گا۔انہوں نے مزید کہا کہ دکھی انسانیت کی خدمت ایک عظیم نیکی ہے اور زندہ قومیں وہی ہوتی ہیں جہاں خدمتِ خلق کا جذبہ رکھنے والے افراد موجود ہوں۔
آخر میں سوسائٹی کی ٹیم نے اس عزم کا اعادہ کیا کہ وہ آئندہ بھی خلوص اور لگن کے ساتھ فلاحی سرگرمیوں کو جاری رکھتے ہوئے معاشرے کے پسے ہوئے طبقات کی خدمت کو اپنا مشن بنائے رکھیں گے۔
