30/10/2024
انیس سال کی عمر میں جیل چلا گیا، اس پر الزام تھا کہ اس نے خفیہ ادارے کی سیکیورٹی توڑ کر ریاست کے کئی راز چرا لیے تھے، اور اپنی چالاکی کی وجہ سے اسے "لومڑی" کا لقب دیا گیا۔
اس کا والد ایک عمر رسیدہ شخص تھا جو اکیلا رہتا تھا اور اپنے گھر کے باغیچے میں آلو لگانے کا خواہاں تھا، لیکن اپنی بڑھاپے کی وجہ سے ایسا نہیں کر سکتا تھا۔ چنانچہ اس نے اپنے جیل میں قید بیٹے کو ایک خط بھیجا:
"میرے پیارے بیٹے، کاش تم میرے ساتھ ہوتے تاکہ اس باغیچے کو کھودنے میں میری مدد کر سکتے اور میں آلو لگا سکتا... کیونکہ میرے پاس کوئی اور نہیں جو میری مدد کر سکے۔"
کچھ وقت بعد باپ کو اپنے بیٹے کی طرف سے خط ملا جس میں لکھا تھا:
"میرے عزیز والد، براہِ کرم باغیچے کو مت کھودنا کیونکہ میں نے وہاں ایک اہم چیز چھپائی ہے۔ جب میں جیل سے باہر آؤں گا تو آپ کو بتاؤں گا کہ وہ کیا ہے۔"
خط ملنے کے ایک گھنٹے کے اندر اندر خفیہ ادارے اور فوج کے اہلکاروں نے گھر کا محاصرہ کر لیا اور باغیچے کی زمین کو اچھی طرح سے کھودا، مگر انہیں کچھ بھی نہیں ملا اور وہ واپس چلے گئے۔
اگلے دن باپ کو بیٹے کی طرف سے ایک اور خط ملا جس میں لکھا تھا:
"میرے عزیز والد، امید ہے کہ زمین اچھی طرح کھود لی گئی ہوگی۔ بس اتنی مدد میں کر سکتا تھا۔ اگر کسی اور چیز کی ضرورت ہو تو بتائیں۔"
