05/04/2026
Garoowe: March 25-26, 2026- Wasiir ku xigeenka Wasaaradda Arrimaha Gudaha, Federaalka iyo Dimuqraadiyeynta Puntland Mudane H.E Abdirahman Khaliif Faarah oo uu Weheliyo Agaasimaha guud Mudane Mohamed AIi Farah Farmayeri ayaa magaalada Garowe ka daahfurtay shir muhiim ah oo ku saabsan Isku-duwidda Maaliyadeed ee Maamul-baahinta, kaas oo qayb ka ah dadaallada lagu xoojinayo dowladaha hoose iyo hirgelinta nidaamka maamul-baahinta ee Puntland.
Shirkan ayaa yimid xilli aad loogu baahnaa iyada oo diiradda la saaray kulanka 1-aad ka doodista kala saarista canshuuraha Dawldaha Hoose iyo Dawladda dhexe ee Puntland, si loo helo nidaam maamul oo hufan, isla markaana si cad u qeexaya awoodaha iyo masuuliyadaha heerarka kala duwan ee dowladda ee ku saabsan kala xadaynta maamulka Maaliyadda labada heer ee Dawladda.
Kulanka waxaa kasoo qayb galay masuuliyiin ka kala socday Wasaaradda Arrimaha Gudaha, Wasaaradda Maaliyadda,Iskuduwayaasha Gobolada ee Wasaaradda Arrimaha Gudaha, Guddoomiyaasha Degmooyinka, Xoghayaasha Degmooyinka iyo ururrada bulshada rayidka ah, kuwaas oo si wadajir ah uga dooday arrimo muhiim u ah horumarinta nidaamka maaliyadeed ee dowladaha hoose. Doodaha ayaa si gaar ah diiradda u saaray sidii loo xoojin lahaa wada shaqeynta heerarka dowladda iyo sidii loo abuuri lahaa hannaan cad oo lagu kala saaro ilaha dakhliga.
Intii uu socday shirka, waxaa si qoto dheer looga hadlay canshuuraha ay degmooyinka xaqa u leeyihiin inay qaadaan iyo kuwa ay qaadi karaan hay’adaha kale ee dowladda. Qodobkan ayaa ahaa mid muhiim u ah yareynta isku dhacyada maamulka iyo kor u qaadidda hufnaanta nidaamka dakhliga. Sidoo kale, waxaa la falanqeeyay habab wax ku ool ah oo lagu kobcin karo dakhliga gudaha ee degmooyinka, si ay awood ugu yeeshaan inay si madax-bannaan u maareeyaan adeegyada ay bulshada u hayaan.
Doodaha ayaa sidoo kale taabtay muhiimadda ay leedahay in si cadaalad ah loo qaybiyo kheyraadka, taas oo door weyn ka ciyaareysa horumarinta adeegyada bulshada iyo dhismaha kalsoonida shacabka. Waxaa la xoojiyay baahida loo qabo hufnaan iyo isla xisaabtan, si loo hubiyo in maamulka maaliyadeed uu noqdo mid daahfuran oo la isku halayn karo.
Gunaanadkii shirka, waxaa la isla gartay in la diyaariyo heshiis wadajir ah oo si cad u qeexaya nidaamka canshuuraha iyo masuuliyadaha hay’adaha kala duwan. Heshiiskan ayaa la qorsheeyay in si rasmi ah loo saxiixo, si loo bilaabo fulintiisa loona xaqiijiyo in go’aamada la gaaray ay noqdaan kuwo la dhaqan geliyo. Waxaa sidoo kale la dejinayaa qorshe hawleed leh waqtiyo cayiman iyo hay’adaha masuulka ka ah, si loo dardargeliyo hirgelinta qodobada la isku raacay.
Shirkan wuxuu ka mid yahay dadaallada joogtada ah ee Wasaaradda Arrimaha Gudaha ku xoojinayo nidaamka maamul-baahinta, laguna horumarinayo awoodda dowladaha hoose, si ay u bixiyaan adeegyo tayo leh oo waara. Waxa uu sidoo kale muujinayaa sida la qorsheynayo in horumar muuqd laga gaaro dhismaha nidaam dowladeed oo ku dhisan wada shaqeyn, isla xisaabtan iyo ka jawaabidda baahiyaha bulshada.
▪︎▪︎▪︎DHAMMAAD▪︎▪︎▪︎
