26/05/2026
Joshua Van Tetti Pangna
=================
Ka khua vuah mi 500 pan 1000 kikal om ding in um ing. Ka nu in tanu 3 nei in tapa khat deih mahmah hi.
Tapa ka neih aleh Pasian nasem dingin aki-ap na dingin thu ngen hi. Tua le kei ka piang hi.
Ka k*m (11) kim in US gam ah ka peemlut uh hi. Hih teng ka tun' ciang ka omdan pen ka nu deihdan na hilo hi. Kei updan zong na hilo hi. Sang ah buaina zong hong tam ciang kitot kilai bekbek tuak ing.
Ka nu zong ka gen hi. Kei bel cihsam hang Pasian nasem thugen khat suak zolo ding, Pasian nasem cih pen thunuam in hoihtak in om a midangte ading etteh huai te ahi uh hi. Kei bel tua bang dan in om theilo hi ing ci in ka gen leh ka nu bel na nuam hetlo hi.
Kei pen ballung zong uk in zong siam ing. Sang ah ka kimawl in taklam wing ah kimawl ing. Sang kalaih khit zawh ka kitot kibuanna lam ah tung ingh. Ataktak in zong ka ukmahmah lam zong ka nu ka gen leh hong lung kimpih loh hang ka kipat tun in Gym ka kimawl na ding hong piak sak hi.
Hih lam ah ka lunglut sak in ka hamciam leh annek hun ihmut hun man tak in ka hih theih hi. Ka lawm te tawh mawk vak nawnlo ka hih man in ka khuasak dan akilam dang ciang ka nu zong nuam mahmah hi.
Kei pen kitup lamsang thu bekbek ka ngaihsun kha hi. Kalup ciang an kanek ciang atawntung in tua thu bekbek ngaihsun ta mai ing.
Gym a kasia te in ni (3) bang pai kei leng phone hong set in, bang sem a, koi ah om? Gym ah citciang hong pai ding na hia? ci in hong sam tawntung hi. Kei bel pong man in kimawl ka hih lel hang kasia te in kiva mahmah nahimaw hong ci in hong gen hi. Kei le kei bel kitheilo, zong ka hihnop le hikha ding, amau in bel katung ah muh hong nei hikha ding hi. Tua bang tawh hun tomno sung in ka gual zo hi.
Pasian nasem Pastor ka hihloh hang ka nu in thu hong ngetsak tawntung hi. Kei zong Pasian tung ah thu ka ngen tawntung hi.
Tua bang tawh UFC ka tunga zawhna te kangah ngah hi.
Tua bang hun in Pasian kisam nawnlo cibang dan in ngaihsutna ka nuntakna ah hong lut hi. Tawn bang ka kiphasak nuam hi.
Tua leh Johnson tawh kapuai un KO tawh kalel hi. Ka kitup laitak in lel ding cih ka thei khawl hi.
Hih lelna in theihsakna hong pia hi. Pasian tawh om khawm lo in bang mah hih zolo cih pen hong tel semsem sak hi.
Hih thu te mitung ah gen gen khawllo hi ing. Bang hang hiam cih leh amau Pasian umlo uh a, zong um ding in ngaihsun lo uh hi. Kei leh Pasian kikal bek ah thei zaw ing. Ka kimaingappih siate leh innkuanpih te tung ah bek gen thei bek ing.
Mi khattek Pasian in mungtup hong pia tek hi. Banghang in kitungpah lo in ziakai hiam?, kipelh na ahang in Pasian hong totsakna banga tangtak a kipai lo in Pasian deihloh lampi ah lut man hi.
Tua ka lelhna pan in tampi tak sinna ka la hi. Pasian in tampi tak hong gen hi. Kiniam khiatna lungsim te Pasian tawh tonkhawp ding akisap thu ka tel zaw sem hi.
Tun ahih leh bang bang kasem zong Pasian kiang ah thu kanget masa khit ciang ka kipan hi. Pantoja tawh ka puai uh zong hun sim hin sim in thu ka ngen thei hi. Kuan sung ah kalut ding ciang zong thu kangen thei hi. Tua bang mah in akibanglo pawlpi tampi te in zong thu hong ngetsak uh hi.
Pasian tawh tonkhawm leng nakhempeuh kizo thei cih pen tetti om hi.
Pantoja tawh puai in zong kiciantak a kimawl ding zong kakisam kei a, alamdang mahmah thupiang tawh gual zawhna kangah hi. Kitupna puai ka man sial in kei i hihzawhna hilo in kei ahonghon Jesu Khris hang in gual zawhna kangah cih thu atawntung in tetti ahi hi.
