Ai

26/06/2022

လူ

09/02/2022

30/12/2021

✓ ယၟုညးဂှ် နာဲဗုင်တေင်..
ဗွဲမသ္ဍိုက်ဆာန် ကော်စမံင်ညးတေံဂှ် နာဲဗုင်၊ ပ္ဍဲကွာန်ဂှ်တ်ှေ ဒၞာဲလဵုသ္ရိဖာပ်သင်၊ သ္ရိကုသိုလ် နွံရောဂှ် နာဲဗုင်တီမံင်ဖအိုတ်ရ။ နာဲဗုင် မိင်နင်ပရိုင် နူလဵုဂှ် ကေတ်ဟွံဒးရ။

✓ နာဲဗုင်ဂှ် ဇၟာပ်ဇၟာပ်ဒၞာဲ မိက်ဂွံသ္ပမံင် အာစာညးတၞဟ်ဖအိုတ်ရ။
ဂွံသ္ပအာစာ ဂွံဟီုဏာညိမှ နာဲဗုင်ပြေစိုတ်ရ။
သာ်ဂှ်ဟွံသေင်မ္ဂး နာဲဗုင် ဟွံပြေစိုတ်လ္တူညးတၞဟ်တ်ှေ ညံင်ညးထ္ၜူမံင် ဗဳယာကီု အရေဝ်ဂၠိုင်မံင် အလုမ်မွဲတ္ရဲရ။

✓ ဟွံဂွံသ္ပလဝ်အာစာ ပ္ဍဲသ္ရိကုသိုလ်၊ သ္ရိဖာပ်သင်ဂှ်တ်ှေ စိာပ်သ္ကိတ်ှေ နာဲဗုင် ဂၠာဲမံင်ဂလာန်ပြး ပ္ဍဲမဂဳနာဲဗုင်ရ။ ဍာံဍာံတေံဂှ် နာဲဗုင်ဂှ် သုင်ဗဳယာဟွံလေပ်ရ။ ဆဂး .. ဟွံဂွံသ္ပအာစာတ်ှေ အရေဝ်ဂၠိုင်တုဲ ဗ္ၜူမံင်ညံင်ညးသုင်လဝ် ဗဳယာကီုရ။

✓ တ္ရဲဏအ် သ္ရိကုသိုလ် အပါဗျုထဝ်အးရ။ တ္ရဲဖျေံကမ္မဌာန် အပါဗျု(အပါယု) နာဲထဝ်အးဂှ် နာဲဗုင် ဟွံပြေကဵုစိုတ်ကွေံကွေံရ။ အခိင်ဖျေံကမ္မဌာန်ဂှ် လဒေါဝ်တ္ရဲ (၁၂) နာဍဳ ဒင်ဒင်ရ။ နာဲဗုင် တိက်ၜက်အာတုဲ ဟွံဂွံသ္ပအာစာ ပ္ဍဲပရေင်ဖျေံကမ္မဌာန်ဂှ် ဟဂှ်ရ။

✓ အခိုက်ကၞာ ဖျေံကမ္မဌာန်တ်ှေ မၞိဟ်တက်ကင်ဂှ် တက်အာကင် ဂတခမဳသင်တုဲ ခမဳသင်ဂမၠိုင်ဂှ် က္ညဗက်အာလက္ကရဴကင်ရ။ လက္ကရဴ ခမဳသင်ဂှ် ဇွကမ္မဌာန် ဗက်အာတုဲ လက္ကရဴ ဇွကမ္မဌာန်ဂှ် ကောန်ဇာတ် မိတ်ပြဝါဂမၠိုင် ဗက်အာရ။ ညအ်ဂှ် ပကတိ ဒးကၠောန် တီမံင်သီုဖအိုတ်ရ။

✓ သွက်ဂွံလၟေင်ဏအ်ဂှ် ဟိုတ်နူ နာဲဗုင်တိက်ၜက်အာတုဲ ဟွံဂွံသ္ပအာစာဟဂှ်တုဲ င္ရုဟ်တိုန်နူသတိက်ဗက်ဂှ် နာဲဗုင်ဂြိပ်ဗက် လက္ကရဴ မၞိဟ်ဂမၠိုင်တုဲ “ ဟေ .. ဟေံ.. ကဵုကင်အာ ဂတလကျာ်ဏး!" သာ်ဝွံ ကညာင်သ္ပဏာ အာစာ ထတ်ထတ် မွဲကအ်ညိရ။
မၞိဟ်ဂမၠိုင် တီမံင်အစောန် နာဲဗုင် အီခၟောမ်မံင် ဗီုညးကဵုညးရ။

✓ ဍာံဍာံတေံဂှ် အခိုက်ကၞာ‌ ဖျေံကမ္မဋ္ဌာန်မ္ဂးဂှ် ကင်ဂှ် အာမံင် ဂတလကျာ်ရရ ရ။ လကျာ်လေဝ် ဗက်အာမံင် လက္ကရဴ ကင်ရရ ရ။ ဆဂး .. နာဲဗုင် မိက်ဂွံသ္ပအာစာညိတုဲ ကညာင်ဟီုဏာ “ဟေ ဟေံ ..! ကဵုကင်အာဂတလကျာ်ဏး"ရ။
✓ ယဝ်နာဲဗုင် ဂွိုအ်သ္ပဏာ အာစာပုဟ်တ်ှေ အလုမ်မွဲတ္ရဲ ပ္ဍဲသ္ရိတေံ မဂဳနာဲဗုင် ဟွံသက်သာရ။ ညတၞဟ်တ်ှေ ဗ္ၜူဗဳယာတုဲ အရေဝ်ဂၠိုင် နာဲဗုင်ဂှ် ဗ္ၜူသ္ပအာစာတုဲ အရေဝ်ဂၠိုင်ရ။

✍️ Ai
30-12-2021 Thursday

16/12/2021

👉 မိတ်ဒါန်လပှ်ကျာ

👉 ယဝ်ခါရ အဲဂွိုအ်ဍေလဝ် Accept ပုဟ်တ်ှေ ဘဝအဲ ၜိုတ်ဏအ် ဟွံဂွံဒုင်စသိုင်ရ။ လပုဟ်တဲအဲ မိက်ဂွံကောပ်လဝ်ကဵုထဝ်မဳလေန်ကွေံကွေံရ။ ဂွံကောပ်ထောံ ထဝ်မဳလေန်ဂှ် အာဲနန်ထဝ် ဒးလိင်လံက်မံင် ဍာ်ဂဥုဲပဝ်လေတ် သ္ရိညးတၞဟ် ၂/၃ မဏီဏောင်

👉 ဟိုတ်နူအဲဍေဒးလဝ် Accept တုဲ ဂွံဆဵုညာတ်ကဵု မိတ်ဒါန်သူဏေင် ကျေဝ်ကျေဝ်မွဲ လ္တူကျာအန်လာင်ရ။ သီုကဵု ဟွံဘိက်မွဲသာ် ဍေံစိုပ်ကၠုင် ဇရေင်ဂၠမ် ဩိုဟ်အဲသိုက်သိုက်တုဲ ဒုင်တၠုင်လဝ် နကဵုမေတ္တာဆာန်ပေင်ပေင်ရ။

👉 ပရေင်ဆာန် အဲကဵုမိစမ္ပာထဝ် ပေင်ကၠုင်ပွိုင်(၆)ဂိတုခိုဟ်ခိုဟ်ရ။ ဘဝအဲ မိတ်ဒါန်ဗီုဏအ် သီုကဵု ဟွံထေင်လဝ်မွဲသာ် ဒေအ်ဆာန် မိစမ္ပာထဝ် စိုပ်ကၠုင်ဇရေင်အဲ နူလ္တူကျာအန်လာင်ရ။ ဟိုတ်နူ မိစမ္ပာထဝ်တုဲ ဘဝအဲ ကလိဂွံမံင် ဇြဟတ်စိုတ် confident ညံင်ဖုင်ဗာတ္ထရဳ ပေင်ကၟိုဟ်မံင်ကီုရ။

👉 တ္ရဲတၟး အကးဇြုင် သွက်ဗုင်ဂၞဴမွဲ သုင် Coffee မွဲခေါ်တုဲ လုပ်ကမၠောန် လံက်ဍာ်ဂဥုဲ ၊ လံက်ပဝ်လေတ်တအ်တုဲ ယှုက်ကဵုကမၠောန် ဇၟာပ်တ္ရဲရ။ စိုပ်ဗတမ်မှ ဂွံအခိင် Video call ကဵု ဒေံဆာန် မိစမ္ပာထဝ်တုဲမှ ဍောင်ပြေတိက်သၠိင်အာ မွဲဗတမ်ရ။ ဒးကဵုမံင် Kiss 😘 ပ္ဍဲ Phone ဇၟာပ်တ္ရဲတုဲ ကြပ်ဒး ဖုမ်မံင်ဂစေအ် ဒးဟစတ်မံင် (ရေမွှေး) ကဵုဖုင်ရဏောင်။ မောဝ်မံင် ဒေံဆာန် မိစမ္ပာထဝ် ပ္ဍဲဖုင် အရိုဟ်ရိုဟ်ဗတမ် ရ။

👉 ဆဵုညာတ်ညးသကအ် လ္တူကျာ၊ လ္ရတ်‌ဝေင် ပရေင်ဘဝညးသကအ်လ္တူကျာ၊ သၟာန်ယၟုညးသကအ်လ္တူကျာ အီတ္ရက်ညးသကအ်လ္တူကျာ၊ ဆာန်ညးသကအ်လ္တူကျာ၊ လၟုဟ် .. မိစမ္ပာထဝ် ကၠေအ်အာနူဘဝအဲ ပ္ဍဲလ္တူကျာယျ ..။

👉 ဒေအ်ဆာန်အဲ ဍေဒး Block key ယျဟာ ဟွံတီ၊ ဇၟာပ်တိုန်လာင် လုပ်ပံက်ရံင် အကံက်ဍေံတ်ှေ ဒှ်မံင် Unknown connection လၟိုန်ရ။ ဟိုတ်နူ Data င္ရုဟ်တိုန်တုဲ ဒေံဆာန်အဲ ကၠေအ်အာဟာ သာ်ဂှ်ဟွံသေင်တ်ှေ ဟိုတ်နူ မိမၜါ ကောဒေအ်တအ် သီထောံဖုင်တုဲ ကၠေအ်ဟာ အဆက်ပိုတ်အာ ဂွံပွိုင်(၃)ဂိတုဲအာယျ။ ရမျှာင် Messager ဗြုတိုန်တ်ှေ ထေင်မံင်လိက် နူမိစမ္ပာထဝ် ဖိုဟ်ရ။

👉 ဒေအ်ဆာန် မိစမ္ပာထဝ်ယျေ .. သီုကဵုဟွံကော်ဘိက်မွဲသာ် စိုပ်ကၠုင်နူလ္တူကျာတုဲ သီုကဵုဟွံထဍေင်ဖျဴ ဒေအ်စဴအာလ္တူကျာ ပၠန်ယျဟာ ..။ ဂၠမ်သြိုဟ်ကောဏအ်ဂှ် ဒှ်ဒၞာဲဒေအ်တအ် ကၠုင်ဇူဝေင်လၟောင် တုဲ ဍောင်ပြေတုဲ သီုကဵုဟွံလဴထ္ၜးစ ယောန်တိတ်အာယျသွံ ..။

👉 စိုပ်ကၠုင်လ္တူကျာတုဲ ကၠေအ်အာလ္တူကျာပၠန် ...။
အခိင်ချူမံင်လိက်ဏအ် အာဲနန်ထဝ် ဒကုဲမံင် ပ္ဍဲကမၠောန်ရ။

တင်ဂုဏ်ရအဴ 🙏

✍️ Ai

16-12-2021 Thursday

14/12/2021

👉 ဒၟာနူဗြာတ်ဗဳလာကျာ်ဇၞော်
++++++++++++++++
👉 လကျာ်ရာမ် အာဲနန်ထဝ်ကဵုမိဣ‌သောဲ ညးၜါ စ်ှေဂွံဒၞာဲ သ္ပဂွံအိန်ထံင် ဂွံၜိုတ်(၂၀)သၞာံ ပေင်အာယျ။ ဆဂး .. ညးၜါဏအ် ကောန်ဇာတ် မွဲလေဝ် ဟွံကလိဂွံရ။ ဆာန်မံင်ညးသကအ် ရဲအရာပ်မံင် ဟွံမာန် ထိုင်းသးမံင် ပြးဇးရ။

👉 လကျာ်ရာမ် အာဲနန်ထဝ်မွဲ တ္ရဲဏအ် ဗှ်သၞာ သွ (ဟင်းပေါင်)ကဵု ခရံက်ဘာပၠန်တုဲ ယောန်အာလ္ပာ်ဘာလကျာ် အ‌ဒေါဝ်ကွာန်တေံရ။
မိက်ဂွံစမံင် သွ(ဟင်းပေါင်)မာကလ်ှေရ ။ ဆဂး .. လုပ်ကလအ်ကျာ်ဇၞော်တုဲ ဗက်စပုင်ဘာ မွဲအလန်ပၠန်။ ဗက်စမံင် ဗီုဗီုဏအ်ဂှ် ရိုဟ်အလန်လေဝ် ဟွံဒးရ။ 😄😄 လအ်ဟွံလအ် အာဗက်စမံင် ပုင်ဘာမွဲတဲ။ သွပံင်ကဵုခရံက်က ခိုဟ်အိုတ်ရ။

👉 တ္ၚဲဏအ် ကုသိုလ်ခိုဟ် အသိင်ကွဟ်လဝ်ကၟဟ် ကြဴကြာတ်လဝ် ပ္ၚာန်ကီုဟာဟွံတီ၊ အခိင်ကလေင်စဴသ္ၚိဂှ် ကျာ်ဇၞော် ကဵုနင်ပရင်တဲ ဗြာတ်ဗဳလာ မွဲခရ်ှေကီုရ။

👉 အီတ္ၚက်စဴ ဟဂှ် ဂွံနင် သီုဗြာတ်ဘာ 😆 စိုပ်သ္ၚိ မဂဳ ညာတ်ဗြာတ်ဗဳလာဂှ်တုဲ အီထ္ၜးမံင်ကဵုလဓဳရ။ ဖေက်ဒးကဵုဗြာတ်ဗဳလာဂှ်တုဲ သ္ပထောံကလော် ဒကုဲတုဲတိက်ထောံရ။ ရန်တၟအ်လဝ် သွက်ဂွံပူဇာကျာ်နွံတုဲ ကွက်စွံလဝ်ဗြာတ်ဂှ် မွဲဒၞာဲရ။

👉 တ္ရဲတၟးအရှိုဏ်တိုန် မဂဳကဵုလဓဳ ညးၜါ ဗီုညးကဵုညး ကတဵုတုဲ မိဣသောဲဂှ် သွက်ဂွံလံင် ပိဏ္ဍပါတ် ဍုန်ပုင် ဂဇံက်ပုင်တုဲ မာံအာဲနန်ထဝ်ဂှ် ယှုက်မံင်ကဵု ဗြာတ်ဗဳလာ ကျာ်ဇၞော် မွဲခရ်ှေဂှ်ရ။

👉 ကြဴကြာတ်ပေါတ်ဇိုတ် ဗြာတ်ဗဳလာဂှ်တုဲ စုတ်ကဵုပ္ရာန် ပူဇာကျာ်တုဲ ရာဒနာမိက် သာ်ဏအ်ရ “ ယွံတၠဳပိုန်ကျာ် ဟိုတ်နူဂွံကဵုလဝ် ဒါန် ဗြာတ်တုဲ ပ္ဍဲဍုင်သွဝ်တေံ မွဲလ္ပာ် မသုန်ကၠမ် မသုန်ကၠမ် ကဵုအဲဍိက် ကလိဂွံညိကျာ်" ရာဒနာမိက်တုဲ တက်ကင်ပိဝါရ။

👉 ရမျာင်ရာဒနာမိက်မံင်ဂှ် မိဣသောဲ မိင်မံင်ဖအိုတ်ရ။ “ ဗြဴဇကုနွံနွံမံင်ဖိုဟ်ဂှ် ရာဒနာမိက်မံင် မွဲလ္ပာ် မသုန်ကၠမ်ဏီရ" မိဣသောဲ စိုတ်တ္ရံက်မံင်ယျ။ ရာဒနာမိက် ဟိုတ်နူ ဟွံစုတ်ယၟု မိဣသောဲကီုတုဲ ဟွံပြေစိုတ်ကဵု လဓဳဇကု အာဲနန်ထဝ်လးလးရ။

👉 မိဣသောဲလေဝ် သီုကဵုဟွံ‌ပြေစိုတ် လံင်ပိဏ္ဍပါတ်တုဲ ညံင်အာဲနန်ထဝ် ဂွံမိင် ရာဒနာမိက် ရမျှာင်ထတ်ထတ်ကီုရ ။

“ ယွံတၠဳပိုန်ကျာ် ဟိုတ်နူ ဂွံလံင်လဝ် ပိဏ္ဍပါတ်ဏအ်တုဲ လ္တူနူ အာဲနန်ထဝ်ကလိဂွံဂှ် မွဲလ္ပာ် (၁၀၀၀) လ္ရီ ကဵုအဲဍိက်ဗြဴ ကလိဂွံညိကျာ်" ထပ်ရာဒနာမိက်ကီုရ။

👉 မဂဳကဵုလဓဳ ညးၜါ စုတိချိုတ်အာတုဲ အာဒှ်ဒေဝတဴ လ္တူဍုင်သွဝ်တေံ သီုညးၜါရ။ အာဲနန်ထဝ်ဂှ် ဒှ်ဒေဝတဴ ပ္ဍဲဘုမ် စတုမဟာရာဇ်တုဲ အတိုင်ရာဒနာလဝ် ကလိဂွံလဝ် မွဲလ္ပာ် (၅၀၀)ရ။ မိဣသောဲလေဝ် ဒှ်ဒေဝတဴ ပ္ဍဲဘုမ်သွဝ်တာဝတိံတုဲ အတိုင်ရာဒနာမိက်လဝ် ကလိဂွံလဝ် မွဲလ္ပာ်(၁၀၀၀) လ္ရီလ္ရီ ကီုရ။

👉 ဒေဝတဴအာဲနန်ထဝ်မွဲ သၠးတိုန်ဗက် ချပ်ဂွံလ္ပာ် သမ္ဘာဆာန်ဇကုတုဲ ဂေတ်တိုန်အာဝေင် လ္ပာ်သွဝ်တာဝတိံတေံတုဲ သၟာန်စမဂဳဇကု ဗီုဏအ်ရ ။
“ ဗီုလဵုရော ဣသောဲ! ဂွံလဝ်မွဲလ္ပာ်(၁၀၀၀) မွဲလ္ပာ်(၁၀၀၀)ဂှ် ပြေပြံင်ပိက်ဟာ" ဒေဝတဴ အာဲနန်ထဝ် သၟာန်တုဲ “ ပြေပြံင် သက်ဟီုဟွံမွဲရ အဓဳ၊ ဣခိင် ဂွံဏမ်ထောံလေဝ် ဟွံမွဲဟဂှ်ရ'' “ တုဲတ်ှေ အဓဳရော ဗီုလဵု! ပြေပြံင်ပိက်ဟာ" ဒေဝတဴ မိဣသောဲ သၟာန်စကီုရ။

“ အဲဂှ် သက်သာနူဗ်ှေညိဏီ ၊ အဲရာဒနာလဝ် (၅၀၀) ဓဝ်ရ ဗ်ှေရာလဝ်(၁၀၀၀)မွဲတဲ " ဟီုတုဲ ကလာင်စဴ နူဒၞာဲဂှ် ဗွဲမပြဟ်ရ။

👉 အတိုင် မိဣသောဲ ရာဒနာမိက်လဝ် ကလိဂွံ မွဲလ္ပာ် (၁၀၀၀)လ္ရီတုဲ အခိင် ဂွံဏမ်ထောံဂှ် ဟွံမွဲရ။ အာဲနန်ထဝ် ဂှ် သက်သာနူ မိဣသောဲဏီရ။ 😆😆

တင်ဂုဏ်ရအဴ 🙏

✍️ Ai
15-12-2021 Wednesday

14/12/2021