Duende Photography

Duende Photography Passionate about photography and creating memories. Thank you for visiting my page. For bookings con

Sommige mense stap in en uit jou lewe.En dan is daar mense soos Claudette wat wat oor jare deel raak van jou hart se sto...
12/05/2026

Sommige mense stap in en uit jou lewe.
En dan is daar mense soos Claudette wat wat oor jare deel raak van jou hart se storie.

Ek ken Claudette al van lank voor sy en Thami se liefdesverhaal begin het. Ons deel ’n liefde vir mooi woorde, handgeskrewe briewe, diep gesprekke en poetry wat stilletjies in mens se hart kom nes maak.

Ek en Melindi het die voorreg gehad om by hulle troue te wees. Nou, soveel jare later, is hul liefde vir mekaar net sterker en is hulle drie pragtige kinders ryker.

Om hierdie gesin af te neem was vir my meer as net fotos neem. Dit was om oomblikke vas te vang van mense wat vir my kosbaar is. Die manier waarop hulle na mekaar kyk, die gelag en gespot, die liefde wat mens sommer kan voel sonder dat iemand ’n woord sê. Daardie liefde kan mens op die fotos raaksien.

Claudy en Thami, dankie dat julle my nog altyd deel gemaak het van julle mooi hoofstukke. Julle het ’n besondere gesin gebou en ek wens vir julle net die heel mooiste wat die lewe kan gee.

♥️♥️♥️♥️♥️

Liewe Lalique en Armand,So twee maande terug stap ek heel onskuldig ’n skoonheidsalon binne vir ’n treatment, en stap ui...
15/03/2026

Liewe Lalique en Armand,

So twee maande terug stap ek heel onskuldig ’n skoonheidsalon binne vir ’n treatment, en stap uit met 'n nuwe gunsteling-mens. Wie sou kon dink!

Lalique, ek moet eerlik wees, ek is een van daardie vrouens wat gewoonlik doodstil is tydens ’n salon sessie. Dis my “skakel die wêreld af” tyd. Maar met jou het ons só lekker begin gesels dat ek nie eers agtergekom het hoe die tyd verby gevlieg het nie. Ek dink dis die eerste keer in my lewe wat ek uit ’n treatment stap en dink: “Sjoe, dit was vinnig verby!”

En toe ontmoet ek vir Armand met die fotosessie, en daar gebeur presies dieselfde “click”! Party mense voel net sommer van die eerste oomblik af soos ou vriende, en julle twee is beslis daai tipe mense.

Dankie vir julle opregtheid, julle humor en sommer net wie julle is. Ek het ons geselsies amper net so baie geniet soos die fotos self, en dis nogal baie gesê! Julle twee is net eenvoudig amazing.

Ek dink vir julle volgende fotosessie is daar net een logiese plan: julle sal moet Kaap toe gaan 😄

Geniet julle fotos! 🤩

Beste Gitte, Baie dankie vir jou opgewondenheid oor jou heel eerste fotosessie! Dit was so spesiaal om saam met jou te k...
08/03/2026

Beste Gitte,

Baie dankie vir jou opgewondenheid oor jou heel eerste fotosessie! Dit was so spesiaal om saam met jou te kon beplan, van die uitrustings en idees vooraf tot die lekker tyd tussen die pragtige bome. Jou kinderlike opgewondenheid en entoesiasme was aansteeklik en het die hele sessie net soveel meer pret gemaak.

Ek hou van die manier hoe jy die hele ervaring geniet het, gelag het en net jouself was. Dis presies daardie oomblikke wat foto’s so besonders maak. Ek hoop wanneer jy na die foto’s kyk, sien jy wat ek deur my lens gesien het, ’n mooi, sagte en pragtige vrou.

Baie dankie dat ek hierdie memories saam met jou kon skep en vasvang. Jou eerste fotosessie gaan hopenlik een wees wat jy altyd met ’n groot glimlag sal onthou! 📸🤍

Grimering deur Melindi Schalkwyk 💖

Liewe Dean en Criska 🤍Baie, baie dankie vir julle “o so lekker” fotosessie. Dit was regtig iets besonders om agter my ka...
02/03/2026

Liewe Dean en Criska 🤍

Baie, baie dankie vir julle “o so lekker” fotosessie. Dit was regtig iets besonders om agter my kamera te staan en julle twee saam te beleef. Ek sien altyd meer deur my lens as met die blote oog, en wat ek van julle liefde kon sien, was eenvoudig pragtig.

Ek is eerlikwaar verlief op julle verliefdheid. Die manier hoe julle saam lag, hoe julle mekaar so diep in die oë kan kyk, hoe natuurlik en gemaklik julle by mekaar is, dis skaars en kosbaar.

Criska, ek ken jou al baie jare, en my hart is só trots op die ongelooflike jong vrou wat jy geword het. Ek kan jou amper nie meer “Callie” noem nie, die naam pas nie meer by hierdie sterk, mooi, amazing mens wat jy vandag is nie.

Dean, welkom by ons groter familie.Jy het klaar in my hart geklim! Dankie dat jy so mooi na Criska kyk. Ek kan sien hoe gelukkig jy haar maak, en sy vir jou. Dit beteken meer as wat jy besef.

Ek hou julle liefdesstorie dop … en dis ’n besonderse mooi een om te sien ontvou 🤍

Beste Kyla, Ek het jou vir die eerste keer in Junie 2024 afgeneem en onmiddellik geweet daar’s iets besonders aan jou. W...
20/02/2026

Beste Kyla,

Ek het jou vir die eerste keer in Junie 2024 afgeneem en onmiddellik geweet daar’s iets besonders aan jou. Was dit omdat jy mooi is? Ja, absoluut VERSEKER! Maar dit was meer as net jou uiterlike skoonheid, dit was daardie innerlike lig, die gemak en opregtheid in jou wat uitgestraal het.

Ek het daardie dag geweet dat jy jou skoonheid, talent en sjarme moet deel. Ek het jou ma gevra om jou modelwerk te laat doen en kyk net wat 'n ware uithaler model jy geword het! Daar is reeds fotograwe wat sirkels hardloop om jou af te neem en ek weet dat daar nog 'n groot toekoms vir jou voorle. Ek hoef nie eers te probeer verduidelik hoe goed jy is nie, hierdie fotos praat vanself.

Kyla, jy het al amper twee jaar terug my en my kamera se harte verower, en ek is jammer ek kan nie hier wees om jou matriekafskeid foto’s te neem nie, ek dink ek moet sommer terug vlieg vir dit! Haha! Maar hierdie fotosessie by een van my gunsteling 'venues' het darem ‘n bietjie van daardie liefde en bewondering opgevang. Jy is absoluut pragtig van binne en buite!

Ek wens jou die mooiste toekoms toe en weet jou ma sal my op hoogte hou van alles wat jy bereik. Ek kan nie wag om te sien wat jou toekoms inhou nie! ✨

Dankie Campagne Living - my gunsteling venue!

Ek het ’n hele paar groot liefdes in my lewe; my fotografie, die natuur, rondrits, die ontdek van mooi plekke, en natuu...
16/02/2026

Ek het ’n hele paar groot liefdes in my lewe; my fotografie, die natuur, rondrits, die ontdek van mooi plekke, en natuurlik die liefde self. Hoe kan ek dan anders as om super opgewonde te wees oor een van die lekkerste fotosessies ooit, waar al hierdie kosbare dinge in één oomblik saamgevang is?

Toe Jarett my vra om hulle verlowingsfoto’s te neem, waarvan Diandra natuurlik niks geweet het nie, het ek natuurlik sommer begin slapies aftel!

Diandra, ek onthou jou nog as ’n klein rooikop haasbek dogtertjie met soveel talente wat jy nou as jonge dame uitleef. Jy is al jare lank deel van my kinders, deel van my hart, deel van my lewe. En toe wys jy nog ’n ekstra talent ook, om ’n oulike man te kies!

Ek het nou sommer vir Jarett ook aangeneem as nog een van my kinders. 😄 Wat ’n voorreg om te sien hoe twee sulke kosbare mense mekaar liefhet.

Dit alles het afgespeel in die natuur, by die pragtige African Hills Safari Lodge & Spa… wat meer kon ek en my kamera vra? En asof dit nie genoeg is nie, die personeel wat so mooi saamgespan het om die verrassing tot op die laaste oomblik geheim te hou.

Jarett, jy het haar hart Saterdag beslis weer van voor af verower. Wat ’n voorreg om deel te wees van julle baie spesiale dag. Dis ’n dag wat ek altyd sal onthou en ek hoop julle ook.

Die foto’s vertel die storie van die liefdes-dag ❤️

Baie lief vir julle 🤍

Liewe Ruan en Elzaan,Baie dankie dat ek die voorreg kon hê om julle gesinsfoto’s te neem. Dit was vir my soveel meer as ...
13/02/2026

Liewe Ruan en Elzaan,

Baie dankie dat ek die voorreg kon hê om julle gesinsfoto’s te neem. Dit was vir my soveel meer as net ’n fotosessie. Ek hoop die fotos bring herinneringe van julle liefde wat vasgevang is.

Elzaan, ons ken mekaar al soveel jare, van daardie dae wat ek kilometers agter jou en Melindi aangery het om netbal te gaan kyk, tot al die kuiers oor en weer, skool aktiwiteite, ens. Ek het gesien hoe jy grootword, hoe jou hart gevorm word, en toe die mooiste voorreg om die liefde tussen jou en Ruan te sien ontwikkel. En nou staan ek hier en kyk na jou as ’n ongelooflike vrou en mamma van twee pragtige dogtertjies, Danika en Nadia. Ek is opreg trots op die vrou wat jy geword het.

Scheun, ek kan sien hoe baie jou drie meisies vir jou beteken. Die manier hoe jy na hulle kyk en hulle beskerm, sê alles. Jy is werklik geseënd om hulle te hê, en hulle is net so geseënd om jou te hê. Dankie dat jy, al hou jy nie van foto’s nie, my die kans gegee het om hierdie kosbare oomblikke vas te vang.

Julle is ’n ongelooflike, pragtige, gelowige gesin. Mag hierdie foto’s julle altyd herinner aan hoe kosbaar hierdie seisoen van julle lewe is.

🩷

Liewe Anna,Wanneer ek terug dink aan die eerste keer wat ek van jou gehoor het, was toe jy navraag gedoen het vir ’n fot...
11/02/2026

Liewe Anna,

Wanneer ek terug dink aan die eerste keer wat ek van jou gehoor het, was toe jy navraag gedoen het vir ’n fotosessie nadat ek jou vriendin afgeneem het. Ek het van die begin af geweet jy is iemand besonders, maar toe ek jou in persoon ontmoet en jou storie hoor, het ek besef hoe ongelooflik jy werklik is.

Ek bly wonder hoe ’n jong vrou soveel lewenslus, vreugde en lag in haar kan dra ná alles waardeur jy is. Jou geloof maak jou nog mooier as wat jy reeds is, dit straal uit jou uit. Ook jou liefde vir die kinders by die skool waar jy werk.

Jy het ’n manier om mense op te lig, selfs wanneer jy self al soveel deurgemaak het. Wanneer ek “down” is, is jy een van die mense wat my weer laat opkyk. Jou vertroue in die Here, wat jy so vrymoedig deel, en jou aansteeklike lag maak dat niemand naby jou kan wees sonder om saam te lag nie.

Anna, dit is ’n voorreg om jou te ken. Ek gaan jou mis wanneer ons trek, maar ek weet ons sal kontak hou. Jy sal altyd ’n sagte plekkie in my hart hê.

🩷

Beste Maryke en Miane,Baie dankie vir ’n onvergeetlike fotosessie by Pretville. Verlede jaar het ek met groot opgewonden...
28/01/2026

Beste Maryke en Miane,

Baie dankie vir ’n onvergeetlike fotosessie by Pretville.

Verlede jaar het ek met groot opgewondenheid 'n fotosessie geborg by die modelkompetisie wat deur Wollies gereel is, en pragtige Miane was die wenner in die junior afdeling.

Mamma Maryke en ek het maande lank probeer om hierdie sessie te reël, maar telkens het iets gebeur, meestal die reën. En toe breek daardie langverwagte dag uiteindelik aan: die dag toe ek hierdie klein modelletjie en haar wonderlike familie kon ontmoet.

Mianetjie, jy is regtig pragtig. Jy het nie die “houding” wat mens soms by modelle sien nie, maar jou skaam glimlag het my reeds betower nog voordat jy een pose geslaan het. Jou natuurlikheid en sagte geaardheid maak jou besonders.

Maryke, julle is ’n ongelooflik oulike gesin. Dit is duidelik dat boeta en pappa se harte (en ja, ook hul koppe 😉) sommer baie groot is oor hierdie mooi sussie en dogter. Dankie dat ek deel kon wees van julle storie en herinneringe.

Miane, ek glo jy gaan nog groot hoogtes bereik in die modelwereld 🩷

25/01/2026

🌿 ’n Spesiale boodskap uit my hart 🌿

Aan elkeen wat al voor my lens gestaan het, en aan almal wat my Duende Photography-blad volg, dankie dat julle deel is van my storie.

Ek het nuus om met julle te deel:

Ek, my kinders en my kleinkind trek aan die einde van Maart na die Kaap Provinsie, in die omgewing van Robertson/Montagu. Ons sien ongelooflik uit na ’n nuwe begin daar tussen die berge en wynlande.

Deur my fotografie het ek van die wonderlikste mense ontmoet. Ek kan nie genoeg dankie sê vir elkeen wat my oor die jare ondersteun het nie. Dankie vir elke fotosessie, elke spesiale oomblik voor my kamera en al die gesels tussendeur die foto’s.

Ek het kinders sien grootword, tieners afgeneem wat later getroud is en nou self kinders het. Daar was soveel lag, manne wat ná 5 minute klaar was met foto’s 😄 en vrouens wat nie kon glo hulle is só mooi soos my foto’s wys nie, maar julle is!

Dit was ’n absolute eer om elkeen van julle te leer ken. Ek dra julle almal saam in my hart wanneer ons hierdie nuwe hoofstuk in die Kaap begin 🤍

Duende Photography gaan aan in die Kaap. Ek sien uit na nuwe plekke, nuwe mense, nuwe landskappe en nuwe herinneringe, maar met dieselfde passie en liefde vir mense.

Met dankbaarheid,
Karin 🩷 Duende Photography

Address

Robertson

Opening Hours

Monday 09:00 - 17:00
Tuesday 09:00 - 17:00
Wednesday 09:00 - 17:00
Thursday 09:00 - 17:00
Friday 09:00 - 17:00
Saturday 09:00 - 17:00
Sunday 09:00 - 17:00

Website

Alerts

Be the first to know and let us send you an email when Duende Photography posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Duende Photography:

Shortcuts

Share

Category