09/07/2026
اتله اروا دې ښاده!
د وطن اتله تا د وطن حق ادا کړ، تا وطن ته بریاوې راوړې، تا د وطن په ماتې اوښکې تویې کړې، تا د وطن د بریا په خوشالۍ کې چیغې و وهلې، د وطن د بریا په شکرانه کې دې خدای ته سجدې وکړې.
نن د وطن غېږې ته په ویاړ سره ستون شوې، نه دې خیانت وکړ، نه دې وطن خرڅ کړ، نه دې وطنوال و واژه او نه دې د وطن د بربادۍ سندرې زمزمه کړې.
زما هغه شیبه ښه په یاد ده، چې د وطن او کرکټ د دفاع په پار دومره غوسه وې، چې آن په خبرو کې دې ژبه بنده شوه.
د وطن اتله!
نن چې دا زرګونه هېوادوال ستا د جنازې په مراسمو کې را ټول شوي، دا ستا حق و، دا زموږ وجیبه وه چې ستا جنازې ته احترام وکړو.
د وطن ټپي زمریه!
د کرکټ په میدان کې ستا لوړه ونه، غټې سترګې، اوږدې زلفې نه یوازې د افغان کرکټ ښکلا وه، بلکې په تا د نړۍ کرکټ ښایسته و. د زمري په شان ستا منډې، له اوږدې فاصلې د بالېنګ سټارټ اخیستلو سره به وطنوالو د وېکټ یا بېټ د ماتېدلو انتظار کاوه.
شاه پور جانه!
د وطن په غېږه کې آرام ویده شه، تا د وطن حق ادا کړی دی، تا د دې خاورې حق ادا کړی!
