03/12/2023
Atları yəhərləyin!
Mərkəzi Asiya mirvarilərinə səfərdən bir neçə gün öncə Qazaxıstandan olan iki xanım turistlə birlikdə Quba gəzintimiz zamanı məşhur Qəçrəş meşəsində fasilə verib çay içək dedik... Bu zaman yolun digər hissəsində at kirayəsi ilə məşğul olan şəxslərdən biri xanımlara yaxınlaşıb, at minməyi təklif etdi. Xanımlardan biri bu “nəcib niyyətli” adamın təklifini qəbul edib, at mindi və gözümün önündə təxminən 30-40 metr irəliyə gedib qayıtdı və at belindən enərkən həmin şəxsə min dəfə çox sağol dedi. Çünki elə bilirdi ki, o gözəl insanın bu təklifi təmənnasız idi. Elə bu anda şəxs xanımdan 50 AZN istəmədimi?! İstədi…
Gözüm kəlləmə çıxdı, bu qədər qısa məsafəyə at sürməyin 50 manata bərabər bir xidmət olmadığını və hərəkətinin də ölkəmizin imicinə zərər gətirdiyini çox xoş formada çatdırdığım zaman mənə, “deyəsən qazanın yağlı tərəfi gedib hə, pul qalmayıb sənə, imkan ver qazanaq da” kimi iyrənc cümlələr dedi. İndi məni kim saxlaya bilər? Başa düşəcəyi dildə cavabını verib, 50 manat ödəməyə hazırlaşan xanımın əlini saxlayıb, 20 manat özümdən verib, yola saldım və bu barədə lazımi orqanları məlumatlandıracağımı bildirdim(amma etmədim çünki başım qarışdı səfərimə). Həmin dəqiqə bütün at sahibləri oradan uzaqlaşdılar.
Xanımların yanında çox utanmışdım, hansı ki, utanmalı olan, ölkəyə gələn turistlərə qan udduran bəzi işbaz, heç bir məsuliyyət və qanacaq hissi olmayan vicdansızlardır. Məhz belə insanlara görə ölkəmizə turistlər ikinci dəfə gəlmək istəmir.
Keçək əsas mətləbə, Qırğızıstan, dünyanın ən gözəl göllərindən birinə aparan Kel Suu yurt kampından at kirayələyirəm, 2 saat irəli, 2 saat geriyə olmaqla, ümumilikdə 4 saat yolumuz var. Bunun üçün dostum Adik ilə birlikdə yəhərli at kirayələyirəm və qiyməti eşitdikdə gözüm kəlləmə çıxır. Ümumi qiymət 30 AZN. Üstəlik bu qiymətə atlı bələdçi də daxildir. Qubadakı hadisə yadıma düşdü, yolboyu xəcalət çəkərək irəliləmişəm…
