24/11/2025
ماتيجو ندردش شويه بعيد عن السطحية اللي بنشوفها
أولا انا بتكلم صيني كويس مش مبرر أبدا اني أوصفلك رايي ف الصين و انت تتاثر بالرأي دا ، ما كل الناس بتتكلم إنجليزي دا مش معناه انه مواليد حواري لندن و يعمل فيديوهات ينتقد الحياه ف بريطانيا
ثانيا معلش حياة الطلاب الأجانب ف الصين مبيحتكش فيها خالص بالمجتمع الصيني ، يعني ممكن يتعرف على ثقافات دول كتير جدا مش منهم الصين اللي هو عايش فيها بحكم انه محاط طول الوقت بالأجانب زمايله اللي جايين من دول مختلفه يتعلمو زيه
وبعدين بلاش سطحيه
المجتمع الصيني مجتمع تقليدي زي المجتمع العربي بالظبط في علاقاته و عاداته و تقاليده و تمسكه بالحياه الاسريه والثقافه التقليديه والأمثال و الحكم الشعبيه وعادات وتقاليد الأكل والشرب و العلاقات بين الأصدقاء والزملاء حتى لو دا أتغير شويه ف الفتره الاخيره بسبب ضغوط الحياه وعلى فكره متغير بنفس النسبه و التأثير ف المجتمعات العربيه
مش من حقك انك تدور على المشاكل و تعممها و تنشرها على أساس أنها صفات منتشره ف المجتمع علشان شويه لايكات و كومنتات، واحنا بنزعل لما حد يصور فيديوهات ف مصر لحاجه سلبيه و ينشرها
فيه ناس بتشارك ف نشر محتوى محترم يظهر فعلا الحياه زي ما هي بواقعية ناضجة ومدروسة لهم منا كل الاحترام
آخر حاجه عاوز أقولها ، مفيش حد عاش ف الصين و مشي منها ومش بيتمنى يرجع يعيش فيها
