17/08/2023
كلمتين كده ع الماشي بخصوص تصوير الافراح بشكل خاص والتصوير بشكل عام سيدي العريس سيدتي العروسة لما بتروح تحجز مع مصور وتسمع السعر بتاعه اللي هو بيتراوح من 1500 ج لحد 3000 وفي باكيدجات اعلي علي حسب كل مصور وامكانياته ومعداته, أول سؤال بيجي في دماغك " ليه يعني هتعمل ايه بكل ده!!! " تعالي اشرحلك هنعمل ايه بكل ده اول حاجة ان المصور بيحجزلك اليوم ده ليك لوحدك من اوله لاخره يعني انت بتبقي محتكره هو ومعداته طول اليوم هلك علشان يطلعلك اليوم بشكل انت ترضي بيه وده في حد ذاته المفروض يبقي المقابل بتاعه " المكسب الشخصي" يكفي التعب اللي عمله تاني حاجة المعدات اللي حضرتك بتتصور بيها دي غالية جدا جدا جدا جدا يعني مثلا انت لو روحت جبت مصور وقولتله انا هأجر كل المعدات انت بس عليك تصور هتروح تأجر معدات لليوم الواحد بحوالي من 1000 لـ 1500ج معدات من عدسات وبادي كاميرا محترم ومعدات اضاءة سواء فلاشات وتريجرات وكمان ديفوزرات زي الاوكتا بوكسز او بيوتي دش تالت حاجة الراجل ده بيكون معاه مساعد أو اتنين سواء لایت مان او سکند شوتر ودول طبعا هو بيديهم فلوس وشربهم ومواصلاتهم عليه ولو العريس راجل ذوق هيعشيهم لانهم اكيد هيجوعو من الشغل من العصر لحد الساعة 12 او 1 لما فرحك يخلص شوف انت بقا سيدي . رابع حاجة معانا وهي مرحلة الايديت ودي اهم مرحلة ومربط الفرس اللي هيبين جمال الصور ينفع تبني شقة وتسكن فيها عالطوب الاحمرا اكيد لا لازملها وش جمالي وده المقصود هنا شغل الايديت ده مجال تاني خالص زي التصوير كده وله ناس متخصصة اسمها ايديتورز ودي بتقبض بردو زينا بالظبط وبردو سيدي العريس اتفق مع المصور انه يصور السيشن والفرح بس وخد منه الصور علي كده وروح اعملهم ايديت انت بنفسك مع اي ايتديتور محترم شغله محترم لو دفعت اقل من 1000ج تعالي وانا اديك معداتي ومش عاوزها تاني خامس حاجة بقا شغل الطباعة اللي بتستلمه اللي هو هيعيش معاك للابد وتشوفه احفادك وولادك شكلكم كان اي وانتو صغيرين بقا ويوم فرحكم الجميل كان عامل ازاي وتبقي للذكري, الشغل ده بيكلف مبلغ كبير بردو بس انت طبعا هتقول ادفع 2000 ولا 3000 ج علي الكام صورة دول ؟؟ ارجع واقولك اقرا البوست من الاول تاني سادس حاجة المعدات اللي معانا دي حساسة جدا جدا لو اتخبطت خبطة بسيطة بتكلفنا احنا مبالغ ضخمة جدا انت مش هتتخيلها ولو وقعت بقا واتكسرت مع السلامة كده باي باي ساعتها انت مش هتيجي تدفع معايا لو اتكسرت فالسيشن بتاعك صح ؟ صح ؟ اه صح طبعا انا عارف فرجاء لما تيجي تسمع السعر اعمل اعتبار لكل اللي فات ده لانه حقيقة مش كدب واسأل اي مصور لو حابب ولما تيجي تفاصل في المبلغ انت كده بتخصم من مكسب المصور الشخصي ودي تعتبر اهانة للمصور لانه مش كسبان من وراك 5000 ج مثلا علشان تفاصل فيهم انا لو بحبك وبعزك هنزلك فالسعر علطول من غير ما تتكلم ولو رضيت بفصالك فده لانك عزيز عليا ومش هاخد من وراك مليم بس متبقاش تفاصل في 500 ولا 600 ج وكمان فاكرني واخد من وراك بازوكة فلوس احنا ساعات بنحط من جيبنا اقسم بالله بس بنعمل حساب ان الشغل علي اسمنا فلازم يطلع بأفضل صورة حتي لو هحط من جيبي فلوس انا كلامي بصفة عامة ومقصدش اي حد بالكلام ده وربنا اعلم والله انا حبيت اوضح للناس بس حاجات ممكن تكون غايبة عنك🌹🌹🌹
