07/05/2023
سمعت قبل كده عن باب زويلة؟
باب زويلة هو واحد من أبواب القاهرة الفاطمية، اللي تم الانتهاء من بنائة سنة ١٠٩٢م، واللي شهد على أهم الأحداث في العصر الفاطمي والعصر الأيوبي.
بيتوسط الباب مقدمة شارع المعز لدين الله الفاطمي من الجهة القبلية وبيعلوه مئذنتين جامع الملك المؤيد شيخ.
اتسمى الباب ب(زويلة) على اسم قبيلة زويلة التونسية اللي جت مصر مع القائد الفاطمي جوهر الصقلي وسكنت جنب الباب.
وهو الباب اللي كلنا عارفين قصته بأنه اتعلق تحته رؤوس رُسل هولاكو لما بعتهم لقطز عشان يهددوا المصريين.
ومن بعد الحادثة دي والباب بدأ يشهد حوادث تانية مأساوية، منهم إعدام السلطان طومان باي اللي كان أقرب وأحب سلاطين المماليك للمصريين، وحتي بيتقال إن المصريين فضلوا يقرأوله الفاتحة كل ما يعدوا من عند الباب.
