23/03/2026
أنا مش بريء… لو كان حبك هو اتهامي، أيوه اتهامي ❤️🇦🇹🏹🤍
عزيزي الزمالك، أنت الفرحة وسط حاجات كتير أوي. بحبك وبحب جمهورك. عشت معاك لحظات كتير أوي، بكيت وفرحت وصرخت واتعصبت وتنحت وغنيت، ولسه مكمل معاك في كل سيناريوهاتك يا حبيبي.
أنت شبهنا يا زمالك، بنقع ونقوم ونزحف ونجري ونطير ونوصل… أنت حياتنا بكل تفاصيلها.
أقولك سر يا زمالك؟ حتى لما بنخسر بنقول حاجات كتير أوي وقتها، لكن اللي بنخبيه عليك وعلى اللعيبة وقتها بس 🥰👌 ( إن رؤيتك هي أعظم انتصار )
عزيزي الزمالك، كل واحد في جمهورك عمل عشانك تضحيات كتير أوي، أيوه زي ما سمعت كده… ضحّينا علشانك والله. مش مطلوب منك غير إنك تفرّحنا بس 90 دقيقة، بتعدي في دقيقة.
90 دقيقة ببص في المدرج، بشوف الناس كلها شبه بعض… مش بعرف أفرق ما بينهم، دمهم واحد. 90 دقيقة الملامح والروح بيكونوا شكل واحد، وكأن شخص واحد قاعد في المدرج بمليون صوت وهتاف وجسم.
عزيزي الزمالك، كلامي مش هيخلص، لكن البوست هيطول… مش لازم أكمله، لكن لازم تعرف إني مكمل حبي ليك، ومكمل معاك إن شاء الله… أنا في ضهرك يا زمالك 🤍 ميدو رجب
