03/03/2025
انا تركت تصوير الافراح نهائيا لوجه الله
خطوة بالنسبالي مش سهله على الإطلاق لإنه مصدر رزقي الوحيد بقالي حوالي 9 سنين كنت بتعلم وبجتهد وبشتغل علي نفسي أن اوصل كل يوم لنسخه افضل ..
يعني انا بعد ما الحمدلله عملت اسم وسمعه وبقى عندي شغل كتير كل الكلام ده هسيبه ازاى ؟
واظن أن في ناس كتير عندها نفس الصراع الداخلي ده بس محتاجه اللي يدعمها في قرار زي ده ، خصوصاً لو كان مصدر دخل أساسي أو حتى مصدر دخل ثانوي في ظل الظروف الصعبه اللي بتمر على الكل.
انا مش بقول أن تصوير الافراح والسيشن حرام 100% ولكن هو في نسبة شبهة أن في جنيه مش حلال داخل لبيتك يبقي الواحد لازم يعيد حساباته مليون مره مهما كانت الظروف وماتستهلش
لحد ما الحمدلله فوقت قولت هو انا لو مت .. هقف قدام ربنا اقول اي!
كنت بحاول بس الدنيا غالية!
وبدأت اقول للناس الي قريبة مني وطبعا كان فيه بعض منهم رفض ومقاومه شديده واللي يقولي حرام عليك بعد ماعملت اسم وسمعه هتضحي بكل دا
انا عارف في ناس كتير هتزعل من قرار دا وانهم كانو عاوزين أن انا اللي اصورهم ف فرحهم .
ولكن في الاول والاخر كل واحد هيتحاسب قدام ربنا "لوحده"
الحمدلله ربنا قدرني وقررت اخد الخطوة دي ومش زعلان علي كل السنين دي ولا علي الوقت ولا على المجهود ولا على أي حاجه لإن ربنا بيعوض وانا واثق كويس ف كلامي دا.
رزقك عند ربنا مش عند حد
لان من ترك شيئا لله عوضه الله خيرا منه
انا مش شيخ وكلنا بنعمل ذنوب وربنا يتوب علينا منها بس هيا بتبقى هداية من عند ربنا
والحمدلله مفيش حد قصدني في اي حاجه في المجال إلا وساعدته والي يعرفني يعرف ده عني كويس
مفيش حد بخلت عليه بمعلومه اعرفها أو مساعده ودائما كنت بحب الخير للكل وعمري ما كان عندي ذرة حقد تجاه أي حد والله
يارب اكون سايب سيرة طيب عند كل حد اتعاملت معاه أو تعامل معايا
طب هتصور اي بعد كده
هتجه لتصوير منتجات أو إعلان لمطاعم أو عيادات أو اي حاجه غير الأفراح أو الحفلات أو اي حاجه فيها شبه بشكل عام
معلش انا طولت عليكم ف كلام
بالنسبة للشغل اللي معايا هخلصه ومش هقبل اي حجوزات تاني
والناس اللي كانت حاجزه معايا للسيزون اللي جاي اكيد هتلاقو حد زي حسين أو احسن منه كمان
وربنا يهدينا جميعا ويثبتنا
• وممتن لكل الناس اللي عرفتهم عن طريق الشغل وهفضل بتمنى الخير لكل صحابي وإخواتي ربنا يوفقكم ويرضى عنكم يارب ♥️
ربنا يوفقني فيما هو قادم بإذن الله ♥️
