31/05/2026
Kiristaanonnii Maaliif Seera Malee Jiraachuu Barbaaduu???
Dhimma hafuuraa yeroo ammaa kiristaanota baay'ee biratti dogoggorri irratti uumamu fi rakkinoota bu'uura Amantii keenyaa kan ta'an keessa tokko "Waa'ee Seera malee jiraachuun waan baay'atuuf, jaalalli namoota baay'ee qabbanaa'uuti" Maatewos 24:12
Kiristaanonnii Maaliif Seera Malee Jiraachuu Barbaadu kan jedhuuf qabxiiwwan tokko tokko fudhannee haa ilaalluu.
1. Namoonni Maaliif Gara Bara Dhumaa Kana Seera Jibbu?
Bara dhumaa kana keessa namoonni seera Waaqayyoo jibbuun isaanii raajii Macaafni Qulqulluun dursee dubbate dha. Sababoonni gurguddoon:
1.1 Fedhii Ofittummaa fi Of-bulchuu (Rebellion and Autonomy): Namni bara dhumaa "ajajamaa" ta'uu hin barbaadu. "Anatu ofii kootiif seera" jedhee yaada. Addunyaan yeroo ammaa "Waan sitti tole qofa raawwadhu" (Do what makes you happy) kan jedhu lallaba. Seerri Waaqayyoo immoo daangaa waan kaa'uuf, namoonni daangaa sana akka hidhaatti ilaalu.
1.2 Hafuura Seera-maleessummaa (The Spirit of Lawlessness): Macaafni Qulqulluun bara dhumaa keessa "hamaan inni seera-maleessi" (the lawless one/Antichrist) akka ka'u fi hafuurri isaas addunyaa irratti akka hojjetu dubbata (2Tasaloniiqee 2:7). Hafuurri kun namoota keessatti fincila uuma.
1.3 Cubbuu Isaanii Dhokfachuuf:
Seerri Waaqayyoo akka daawwitii ti; cubbuu keessoo namootaa ifatti baasee agarsiisa.
Namoonni cubbuu isaanii jaallatan daawwitii sana (seera) ilaaluu hin barbaadan; kanaaf seera jibbu.
Roomaa 7:7 Egaa immoo seerri ofuma isaatii cubbuu dha jenna moo ree? Kun matumaa hin ta'u. Haa ta'u iyyuu malee, utuu seerri hin jiraannee ani cubbuu hin beekun ture; utuu seerri “Waan namaa hin hawwin!” hin jenne ta'ee, hawwuun maal akka ta'e hin beekun ture.
2. Kakuu Haaraan Seera Cabsaa?
Matumaa! Kakuu Haaraan seera hin cabsu, hin diigus. Fakkeenyaaf, ergamaan Phaawuloos akkas jedha:
Egaa immoo amantii kanaan seera diigna jechuu dha moo ree? Waawuu, kun raawwatee ta'uu hin danda'u, seera jabeessinee dhaabna malee. Roomaa 3:31
Garaagarummaan Kakuu Moofaa fi Kakuu Haaraa maali?
2.1 Kakuu Moofaa keessatti: Seerri gabatee dhagaa irratti barreeffamee, namni dhuunfaa isaatiin akka eegu gaafatama. Kun immoo dadhabina foonitiif hin danda'amne.
2.2 Kakuu Haaraa keessatti: Waaqayyo seera isaa dhagaa irratti osoo hin taane, garaa fi yaada keenya keessa kaa'uudhaan Hafuura Qulqulluu nuuf kennuudhaan, jaalalaan seera isaa akka eegnu humna nuuf kenna.
Ibroota 8:10, Ermiyaas 31:33 Guyyoonni sun yeroo ga'an, kakuu ani mana Israa'eliif kakadhu, ‘Seera koo yaada isaanii keessa nan kaa'a, garaa isaanii keessattis isa nan caafa; ani isaaniif Waaqayyo nan ta'a,isaanis anaaf saba in ta'u, isa jedhuu dha’ jedha gooftichi.
• Kakuu Haaraan seera kan cabsu osoo hin taane, karaa sirrii seera itti eegan (humna Hafuura Qulqulluutiin fi jaalalaan) kan nu barsiisu dha.
3. Namoonni Yeroo Yakka Raawwachuu Barbaadan "Seera Seera Jettu" Jedhu Kun Maal Jechuudhaa?
Yeroo baay'ee namoonni cubbuu raawwachuu dharra'an, yeroo isaan gorsitu ykn seera Waaqayyoo yaadachiistu, "Kun Kakuu Moofaa dha, nuyi ayyaana jala jirra, seera seera hin jedhinaa" jedhanii si deebisu. Kun maaliif ta'a?
3.1 Ayyaana Waaqayyoo Dawoo Cubbuu Godhachuuf: Namoonni tokko tokko "Ayyaana" jechuun "cubbuu akka barbaadanitti hojjechuuf hayyama argachuu" akka ta'etti hiiku. Kun dogoggora guddaa dha. Ergamaan Yihudaa akkas jedha: "Warri Waaqayyo malee jiraatan, ayyaana Waaqayyo keenyaa argachuun “Gad-dhiisatti jiraachuu dha” jedhanii yaada isaanii diddiiranii, gooftaa keenya Yesus Kristosin isa kophaa isaa gooftummaa qabus gananii, lo'anii nu gidduu galaniiru. Isaan kun wanta yakka isaanitti mursiisu kana jalatti duraan dursanii caafamaniiru". Yihudaa 1:4
3.2 Yaada garaa ofii cal'isiisuuf: Yoo seera Waaqayyoo fudhatan, yakki isaanii yakka ta'ee itti mul'ata. Kanaaf, yaada garaa isaanii isa isaan yakku sana callisiisuuf, barsiisa "seerri hin jiru" jedhu uumanii ittiin of jabeessu.
4. Gooftaan "Ani Seera Diiguuf Hin Dhufne, Cimsuun Dhufe Malee" Inni Jedhu Maal Jechuudhaa?
Maatewos 5:17 irratti Yesuus akkas jedhe:
Ani, “Seeraa fi barsiisa raajotaa diiguudhaaf waanan dhufe hin se'inaa, ani isaan raawwachuudhaafan (fufills) dhufe malee, diiguudhaaf hin dhufne.”Maatewos 5:17
Kun maal jechuu dha?
4.1. Guutuuf (To Fulfill): Seerri Moofaan masihicha (fayyisaa) agarsiisa ture. Yesuus jireenya cubbuu hin qabne jiraatee seera guutummaatti eeguun madaallii seeraa guute. Akkasumas fannoo irratti du'uudhaan gatii seera cabsuu keenyaa nuuf kaffalee seera raawwate.
4.2. Cimsuuf/Gad-fageessuuf (To Elevate/Clarify): Yesuus seera foonii qofa osoo hin taane, yaada keessoo adeemsise. Fakkeenyaaf:
• Seerri Moofaan: "Hin ajjeesin" jedha (Maat. 5:21).
• Yesuus immoo: "Obboleessa kee kan jibbitu yoo ta'e yaada keetiin ajjeesteetta" jedhee seera sana garaa keessatti cimsa (Maat. 5:22).
• Seerri Moofaan: "Ejja hin raawwatin" jedha.
• Yesuus immoo: "Ija hawwiitiin dubartii laaluun iyyuu Ejja" jedha.
• Kanaaf, Yesuus seera hin diigne; caalaatti qulqullummaa isaa ifa godhee nuuf kenne.
5. Maatewos 24:12 "Seera malee jiraachuun waan baay'atuuf, jaalalli namoota baay'ee qabbanaa'aa in adeema." Isa jedhu irraa maal barannaa?
kutaan kun dhimma seeraa fi jaalalaa walitti hidha. Akkaataa itti wal-qabatan haa ilaallu:
5.1. "Seera malee jiraachuu" (Lawlessness): Jechi Giriikii asitti itti fayiidame "Anomia" jedhama. Kun seera dhabuu qofa osoo hin taane, "seera Waaqayyoo beekanii fudhachuu diduu, daangaa cabsanii jiraachuu" jechuu dha.
5.2. Walitti Hufeenya Seeraa fi Jaalalaa:
• Macaafni Qulqulluun "Gudunfaan seeraa jaalala" jedha (Roomaa 13:10).
Namni nama erga jaallatee, waan hamaa isa irratti hin hojjetu; kanaafis nama jaallachuun seera raawwachuu dha. Roomaa 13:10
Seerri Waaqayyoo kurnan bakka lamatti qoodama: Waaqayyo jaallachuu (1-4) fi nama jaallachuu (5-10).
• Yoo ati seera "hin hatin", "ejja hin raawwatin", "sobaan dhugaa hin ba'in" jedhu eegde, nama jaallachuu keeti.
• Yeroo namoonni seera Waaqayyoo lagatan (seera-malee ta'an), ofittummaatu uumama. Nama dhimma itti hin baane, faayidaa ofii qofa barbaadu. Kun immoo jaalalli akka qabbanaa'u godha.
5.3. Bara Ammaa Wajjin Wal-bira Qabnee Yeroo Ilaallu:
• Yeroo ammaa cubbuun akka jireenya salphaatti ilaalama. Maatiin wal-diiga, amanamummaan dhabameera, namni namaaf hin gaddu. Sababiin isaa maali? Namoonni seera Waaqayyoo isa "namni dhuunfaan kabajamuu qaba, cubbuun adabbii qaba" jedhu waan dhiisaniifi.
• Seerri Waaqayyoo akkuma dallaa eegumsaa (fence) ti. Dallaan sun yoo diigame, bineensi hundinuu seenee midhaa uuma. "Seera-maleessummaan" dallaa sana diiguu dha; kanaan kan ka'es jaalalli fi nageenyi addunyaa keessaa in bada.
Walumaagalatti, firoota ko, seera malee jiraachuun bilisummaa osoo hin taane garbummaa cubbuuti. Kakuu Haaraan ayyaana nuuf kenne malee seera Waaqayyoo isa qulqulluu hin diigne.
Hafuurri qulqulluun kan nuuf kennameef, seera dhiisnee akka fedha foon keenyaa jiraannuuf osoo hin taane, jaalalaan guutamnee seera Waaqayyoo gammachuun akka eegnuufi. Bara dhumaa kana keessatti seera-maleessummaa addunyaa irra jiru dura dhaabbannee, jaalala keenya osoo hin qabbaneessin seera jaalalaa eegnee jiraachuuf haa tattaafannu. Waaqayyo humna isaa nuuf haa kennu! Ameen
Luba Tame Lammeessaatiin
