08/09/2026
Xukuumadda Somaliland Oo Ganafka Ku Dhufatay Go’aan Ay Shirkadaha Korontadu Ku Shaaciyeen Kordhinta Qiimaha Korontada
Hargeysa (HT)- Xukuumadda Somaliland ayaa ganafka ku dhufatay go’aan ay shirkadaha korontadu ku shaaciyeen inay ku kordhinayaan qiimaha korontada, iyadoo Komishanka Nidaaminta Tamartu caddeeyey in aan la oggolayn wax korodh ah oo ka baxsan tacriifadda rasmiga ah ee dalka.
War-saxaafadeed ay soo saareen ururka shirkadaha Korontada, ayaa lagu sheeegay inay bishann 9aad kordhinayaan qiimaha korontada, iyagoo taas ku sababeeyey saamaynta dagaalka Bariga Dhexe ku yeeshay qiimaha shidaalka caalamka.
Hadalka iyo tallaabada shirkadaha korontada ayaa si toos ah uga hor imanaya go’aan uu Madaxweynaha Somaliland h**e sannadkan u soo saaray, kaas oo lagu dhimay qiimaha korontada si loo yareeyo culayska dhaqaale ee ka jira shacabka.
War-saxaafadeed uu maanta soo saaray Komishanka Nidaaminta Tamarta Somaliland ayaa lagu sheegay inaanay jirin hay’ad ama cid sharci ahaan awood ugu leh inay si iskeed ah u kordhiso qiimaha korontada, isla markaana shirkadaha adeegga korontadu waajib ku tahay inay ku shaqeeyaan tacriifadda rasmiga ah ee la ansixiyey.
Komishanku waxa uu sheegay in tallaabooyinka ay shirkadaha qaar ku doonayeen inay ku kordhiyaan qiimaha korontadu yihiin kuwo aan waafaqsanayn nidaamka sharci ee dalka, isagoo faray shirkadaha inay si buuxda ugu hoggaansamaan qiimaha korontada ee uu dejiyey go’aanka xukuumadda.
Arrintan ayaa noqonaysa isku dhac muuqda oo u dhexeeya go’aanka shirkadaha korontada ee kordhinta qiimaha iyo siyaasadda xukuumadda Somaliland ee h**e loogu dhimay qiimaha korontada dalka.
Komishanka Nidaaminta Tamarta ayaa ugu dambayn uga digay shirkadaha korontada inay jebiyaan tacriifadda la ansixiyey, isagoo carrabka ku adkeeyey in tallaabo sharci ah laga qaadi karo cid kasta oo ka hor timaadda go’aannada iyo xeerarka lagu maamulo qiimaha korontada Somaliland.
Hargeysa Today
