27/07/2021
Support
半夜三更，又係時候講下啲感性啲嘅嘢，希望你可以花一分鐘睇睇。
2016年8月里約奧運，因TVB竟然冇直播張家朗嘅32強賽事，仲強詞奪理話「咪已經播咗16強」而畀我出post怒屌，結果蘋果、立場、01等傳媒跟進，最終電視台承諾會優先播出所有香港運動員嘅賽事。
2017年4月，我有幸得到多位友人贊助兼申請到記者證，遠赴保加利亞嘅世界青少年錦標賽，透過CALL4VAN嘅Facebook live直播幾場香港隊嘅賽事，更親自目睹張家朗首次成為青年組別嘅世界冠軍，同喺香港嘅近千位觀賞嘅朋友分享喜悦。
2017年6月，香港首次舉辦亞洲劍擊錦標賽，C4V得到批准下喺Facebook轉播，並成為香港歷史上首次同時有前奧運選手+亞運領隊兩位專業評述嘅劍擊賽事，點擊率更多達萬次。
2018年8月雖然未能直播耶加達亞運，但親自在場為一眾港隊劍手打氣，回程時更係半機香港運動員同行，感覺奇妙，與有榮焉。
回望過去幾年，雖然所做並非大事，但都希望各位認同，推廣劍擊運動「本台」算曾盡過綿力。我亦深信每個人只要有份執着，都可以有唔同程度嘅付出，最終見到一件對於自身未必得益但樂見嘅美事。
到咗今屆東京奧運，張家朗、江旻憓等名字已經家傳户曉。傳媒採訪、贊助、廣告肯定會蜂擁而至，實在可喜可賀。
至於C4V作為蚊型企業，一未有財力贈送洋房，二則覺得與其錦上添花，不如雪中送炭，更具意義。
所以，我決定未來三年為體育學院嘅超過1800位獎學金學生或全職運動員，提供免費接載*（需符合法律上「載貨」定義，即只要攜有任何類型嘅運動器材），有效期直到下次2024年嘅巴黎奧運。
香港嘅運動員，你哋嘅路，唔單止身邊嘅教練、屋企人、醫護人員、心理學家等等嘅支援團隊，仲有更多素未謀面嘅香港人同你同行。
多謝所有香港運動員嘅默默耕耘，你哋係香港凝聚嘅力量，令香港人引以為榮。
*假設全部1800位運動員每日都call車出入體院，CALL4VAN 100%全數補貼完畀司機後唔使幾日就會收皮；但只要inbox我哋嘅，都盡可能安排最少一次免費，真係入不敷支的話，都繼續堅持有折扣優惠。
最後，多謝你睇到呢度，亦希望你可以share呢個post出去，尤其是令仲係晏晝4點一放學就要衝入體院訓練嘅學生運動員，可以知道呢個安排；同時冀望有能力嘅香港人、機構同公司見到之後，用自己嘅方法去支持香港運動員。
Conrad Wu
CALL4VAN創辦人
1037 小編後按：收到好幾個有關捐款支持我哋嘅查詢，多謝大家厚愛。腦細唔希望有賬目不清之嫌，先婉拒大家🙏🏻 希望大家都可以用自己方式支持我哋嘅運動員🇭🇰 都多啲向身邊朋友介紹下我哋啦～（呢句小編細細聲講嘅）
