25/02/2023
Mesye/Medam
Bonjou/Bonswa
Nou remèsye tout fanatik ki renmen epi k ap sipòte atis site Anakawona yo, san n pa bliye wete chapo n byen ba douvan medya tout plim tout plimay ki pa sispann ba nou bourad.
Depi kèk lane, konkou tradisyonèl radyo Amikal la pwovoke eskandal sou rezo sosyal yo akoe anpil feblès nan fason l òganize. Plizyè atis leve vwa yo pou mande responsab radyo sila a rann Yogann fyète li te toujou genyen an, pami atis sila yo, nou jwenn Rozo-G.
Nan yon nòt ki pibliye sou paj radyo Amikal la, enstitisyon an pwodui yon atak pèsonèl kont rapè a akoz kritik li pote piblikman sou konkou a. Kominikasyon sila vyole prensip ki ta dwe regle relasyon ent medya kòm enstitisyon ak atis yo ki se kolaboratè medya yo. Nou menm atis, leve vwa n pou denonse sa.
Enstitisyon an pa gen pou l ap reponn yon patikilye nan fè atak pèsonèl, tankou sa ta ka fèt ant 2 endividi ki nan bif.
Se yon gwo mank etik, lè radyo Amikal revele yon pwopozisyon patenarya biznis yon atis te fè yon medya pou li tante kache enkapasite l pou l òganize yon konkou ki reponn ak nivo atant popilasyon an, epi sispann tounen sijè blag sou rezo sosyal yo.
Anplis, atak Enstitisyon an pa danse kole ak prensip jounalistik yo ki vle verifikasyon avan tout pataj enfòmasyon. Amikal fè manti, petèt toujou nan menm lide pou jwenn vyouz ki anime konkou a.
Pou listwa ak laverite, Rozo-G pa t janm komèt ankenn zak malveyan. Atis la te jwenn entèpelasyon Lapolis nan kad yon ankèt sou yon machin li te prete, oubyen echanje kont machin pa l pou yon jou. Aprè Lapolis te fin eklèsi sitiyasyon an, Rapè a te rantre lakay li nan demen entèpelasyon an. Se mechan, pou yon enstitisyon tankou Amikal itilize sa pou fè bif, pandan li denatire enfòmasyon an. N ap di l ankò : pèsonn responsab pa dwe itilize yon patrimwàn kominotè pou fè bif pèsonèl, menm si pratik sa ta nan ADN li menm kòm moun.
Pou sa ki gen pou wè ak kesyon mizik Rozo G pou konkou a, atis la esplike : " Sa gen 3 lane, mwen te pwopoze estaf Radyo a mizik mwen (Viktim deja) pou konkou a. Mwen te pwofite okazyon an pou m konseye yo yon lòt fòma pou konkou a mwen te estime k ap pi adapte ak tan an. Mwen t ap asire tout pri yo nèt epi akonpanye atis yo pou rès karyè yo. Mwen te pwomèt mizik, videyo ak pwomosyon ".
Krache sou Rozo G, kowodonatè Rasanbleman Atis Leyogàn (RAL), se atake tout atis alawonnbadè. Nou menm estaf atis Yogann yo, n ap denonse atak pèsonèl sila epi pote solidarite n ak Frè n, Rozo G.
N ap pwofite pwopoze radyo a, rewè fòma konkou a. Pase atis yo odisyon avan yo parèt layv. Pase men sitou nan imaj radyo a pwojte nan difiziyon sou rezo sosyal yo, valorize chanpyon yo, nan akonpanye yo aprè konkou a epi pwomote travay yo, se kèk pwen ki ka ede nan sa. Li lè li tan pou nou sispann jwenn yon konkou blag nan plas yon konkou chante.
Boutonfen, n ap swete tout estaf la bon diznevyèm. Nou anvi wè plizyè lòt bouji jwenn plas sou gato lonjevite a. Men tou, yon konkou ki nan nivo ansyènte l.
Koze Atis Lakay✅
