11/09/2024
HAPPY BIRTHDAY IN HEAVEN, DAD.
Thang khat lian aia rei mah a vei ta. He album tuipuia kan unaua kan kur ve nguai nguai hun kha. Nunhlui an chang a, khuarei changin hun leh sulin a liampui ta. Mahse, he thinlungah hian nimin ang maiin a la thar a. Mitthlaah a lo thar a, zep nak emaw, muttui a hnam a nih hi le.
Ni, khang hun lai khan ka u, fam chang ta khan Thingsul lam nula kha a hmu tai ve tlat a, theihtawp kan chhuahpui. Mahse, amahin a zir ngang lo a, thianah an chhuak thei hram a. A hnu lawkah, Ratu lam nula lamah a rilru a pe leh a. Theihtawp kan chhuahpui a, kan sawi fel vek tawha kan inngaih laiin, a hma ang bawkin, thianah bawk an inchhuah leh a. Kan beidawngin, “Leng tar tura Khua ruat I nih hi,” ka tita hial a. Ni, ani kha, tual lim lo, rual pawh pawl ngai lo a ni miau a, keini’n kan hriatthiam anga nula lamin an hrethiam lo kha a buaithlak lai a ni ber e.
Mak tak erawh, ka thiante khan eng dawi hlo nge an lo tulh dawn ni!? Thih ngam khawpa ka chetsual vanga phai kuama kan liam lai khan tu emaw a lo thlung nghet ve teh mial a! Nupaah hial an insiam ta kha a ni a, an karah fa pathum ngawt an piang a. Mahse…..Mahse, an inhmangaihna kha a lo tluantling si lo a ni ang, nu berin, fate pawh ngaihsak chang lovin a chhuahsan ta daih a! Ka u lah, changpat chehchhum ang chauh a ni ta si a.
Pa laka malsawmna an dawnte chu ka nupa kuta nghahin an awm a. Hei, vawiin hi kan thlenpui ta chu a ni si a. An inthen laia k*m hnih awrh chauh kha, k*m 16 lai a lo ni ve ta. Anni enkawl thei tura chakna min petu, Lalpa a ropuiin kan fak bang lo. A phena ka nu leh pa te erawh ka sawi lo phal lo. Anni pahnih leh naupangho pa lahin chatuan khawvar hun atan lei nun min hnuchhawnsan tawh si a!
Imm…tul lo ka sawi duah pawh a ni thei e! Zirtirtu zawng zawnga ropui ber chu Krista a ni. Mahse, ka hmuh leh khawih theiha zirtirtu ropui ber erawh, KA PA kha a ni. A la hma hret na a, naktuk mai khi a pianchampha phak a ni a. Ka ngai thar lo thei lo a. Ani hi kan pa ni lo sela, a fate hian kan vawiin hi kan thleng dawn si lo. Naktukah chuan ziak turin chakna ka nei leh dawn lo tih ka hriat vangin ka han hma hret a ni e.
Pension thak thlengin zirtir hna a thawk a, office lama awm ve tura antih pawhin, “Ka thiam ve lo ang,” tia zirna run thlang talh talh thin kha a ni a. Tunahchuan, Zirtirtu ropui ber, a entawn, Isua hnenanah zirtirna a kalpui ka ring hial a ni.
Kei hi, a fate zingah pawh, BLACK SHEEP antih ang kha ka ni a. K*m khat dawn ka rawl bosan a. Ka chin hre hauh lovin ka chhungte kha, thla tam an awm. Mahse, Aizawlah ka awm a ni tih a hriat veleh, ka awmnaah lo kalin, ina haw leh turin thingthiin min ngen a nia! Khata chin kha, ka pa ka hawisanin ka phatsan leh ngai tawh lo!
Vanduaina ka han tawk a, ka tan a neih zawng zawng a khawh ral a. Tiang hawla khawlai ka chhuah ve ttheih tirh khan, “Mate, I dam leh nana kan sum hman zawng zawng hin, Aizawla inhmun tha ber leiin, in tha tak kan sa thei ang,” tiin min hrilh!
Ka pa a han pension khan, kan inzui nasa hle a. Motor chiang lo, workshop ka kal thlengin min zui a. A lo muthlu lawp lawp thin. A kianga ka thla a muang ang bawk khan, ka kiangah khan a thla a muan ve niin ka hre hial thin.
A piamchampha phak vawi 76 kan thleng dawn/ thleng ta. Van nuamah, ka nu leh ka u, a unau te leh a tu leh fate bakah, Van Angel te nen hlim takin an lawm ngein ka ring. Tin, min han thlir ve ngei pawhin ka ring a ni.
Zirtirtu a nih angin, ICU atanga a lo chhuah pawh khan, a chenpuite tana zir tur min fah awl lo a. ICU a luh leh zan, khami chhuna a damdawi leh mamawh lama ka chhuah hlana ka laka sawi duh a neih, ka ngaithla hman lo kha chu a pawi tih mai loh chu, sawi tur ka hre lo!
Tunah zawng, muangin a chawl tawh a, nimahsela; a pianchampha phak a lo thlen hian, thinlungah a thar lo thei si lo a.
Happy Birthday in Heaven, Dad. Ka nu leh Mam te nen khan hlim takin hun lo hmang rawh u aw. Kan ngai em em che u…..
