19/10/2019
-上高地涸沢槍岳登山遊記-
『因為一張相，所以計劃行程起來🤘』
登山 Day 1
由於今次飛大阪，需要早一晚坐21:30開出既坐通宵巴士往上高地，05:30到達。由於上高地本身已經有1600海拔，醒唔起拎定件衫落車時涷到仆街，已行摷返d衫出黎著，清晨應該只有5度左右🤦🏻♂️。
跟住就整頓好行裝，啪一個飯團～06:00就起步。
今日行程需要行10公里平坦而比較悶既路到達橫尾，09:30左右到達橫尾，休息食野之後就開始上山4公里到涸沢。就係因為涸沢一張紅葉季節既相，造就左今次旅程。沿路都開始見到愈來愈多紅葉，景觀都愈來愈開揚，13:30左右就到達涸沢山屋，休息左一陣就扎好營，整個飯食下，影左幾張相，太攰5點幾就訓左。半夜起身去放水，成個天都係星星，可惜相機仔能力有限唔太影到，機到用時方恨少🤷🏻♂️，唯有用眼睛記低。
登山 Day 2
訓醒天氣開始多雲，睇唔到晨光照射落涸沢既美景，而天氣如同預測一樣，下午後會月開始陰天，晚上將會開始落雨，食完早餐後商討決定如計劃先到槍沢山屋，再看明天天氣決定行程。
落山遇到一對Hongkonger 同樣路線去槍沢山屋，我地咩住大背狼行先，之後山屋見。橫尾食野休息後，大約13:30左右到山屋，休息整頓好等沖涼。係啊，山屋有得沖涼，沖完涼又睇下天氣，明天天氣全雨，E級，唯有決定滯留多一日，靜觀其變。
之後就等食飯，住左甘多次山屋，終於明白原來只得富士山甘慘，只得一塊漢堡扒同咖哩汁飯，一杯茶，配給制🤦🏻♂️
食飽飯冇野做R腳指，都話左應該帶定副啤牌上山咖啦🤷🏻♂️🤷🏻♂️🤷🏻♂️8點半熄燈就訓左。
登山 Day 3
山屋早餐5點，今日既行程係『冇。行。程』，養豬。好彩都上到下網冇甘悶。
睇左天氣淩晨3點後會開始天清，機會黎啦，晚飯後執好攻頂袋，8點就訓左。
登山 Day 4
2點半起身食左包飯，著好衫，出發，室外氣溫5度，天清冇雲🤘今日要上海拔1000m，落1000m，再落返橫尾到德澤園訓。
養豬千日用在一時，夜晚行得比預期快，好快就到左開揚既山腰，開始見到晨光，繼續行，冇幾耐太陽就曬到埋身，感覺到溫暖，太陽照住山頭好靚，影下相，8點左右終於捱到上山頂，太肚餓在山屋食左個500 Yen 既杯面😅。
休息左陣，租左頭盔就爬上槍岳頂，雖然只有100米高，但全程都要落手爬，山上面仲一對老夫婦，70幾歲都一樣爬到上去，日本人真係好勁👍山頭上退休人士占既比例遠高後生仔女
因為早一日落左一整日雨，今日天好清，個View 冇得頂，甘辛苦上到黎都值得。
上完就到戲肉，要落1000海拔返到山屋，再行3個多小時先到今晚住既地方，最後最後，5點左右到步，是日行左～22公里，攰到隻蟹咁🤦🏻♂️
好彩德澤園住得比都舒服，野食又豐富。叫做返回天堂🤘一覺訓到天光。
Day 5
今日行程最hea, 行2個令小時就到巴士站返大阪
一早食左早餐，周圍影下相，曬下太陽，就慢慢爛返出去，去到河童橋買下手信。
腳已跛
-完-
-謝謝收看-
