24/08/2026
លោក ណយ ច័ន្ទតារាប្រធានមន្ទីរការងារ និងបណ្តុះបណ្តាលវិជ្ជាជីវៈបានអញ្ជើញចូលរួមវេទិកាសាធារណៈថ្នាក់ជាតិ នៅស្រុកកែវសីមា ខេត្តមណ្ឌលគិរី
នាព្រឹកថ្ងៃចន្ទ ១១កើត ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៤ ខែសីហា ឆ្នាំ២០២៦ ឯកឧត្តម គង់ គឹមនី អភិបាល នៃគណៈអភិបាលខេត្តមណ្ឌលគិរី និងលោកជំទាវ ទន សុគន្ធា អនុរដ្ឋលេខាធិការ ក្រសួងប្រៃសណីយ៍ និងទូរគមនាគមន៍ ចុះជួយឃុំស្រែខ្ទុម ស្រុកកែវសីមា បានអញ្ជើញដឹកនាំវេទិកាសាធារណៈថ្នាក់ជាតិ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល សម្រាប់នីតិកាលទី៧ នៃរដ្ឋសភា នៅភូមិឆ្នែង ឃុំស្រែខ្ទុម ស្រុកកែវសីមា ខេត្តមណ្ឌលគិរី។
ក្នុងវេទិកានេះ ប្រជាពលរដ្ឋបានលើកឡើងនូវបញ្ហាប្រឈម និងសំណូមពរដែលពាក់ព័ន្ធនឹង ការផ្គត់ផ្គង់អគ្គិសនី ផ្លូវថ្នល់ ស្ពាន អណ្តូងទឹក ការកំណត់ព្រំប្រទល់រដ្ឋបាលរវាងខេត្តមណ្ឌលគិរី និងខេត្តក្រចេះ ព្រមទាំងសំណើសុំបណ្ណសមធម៌ និងបញ្ហាផ្សេងៗទៀតពាក់ព័ន្ធនឹងជីវភាពរស់នៅរបស់ប្រជាពលរដ្ឋ។
ក្នុងឱកាសនោះ ឯកឧត្តមអភិបាលខេត្ត បានយកចិត្តទុកដាក់ស្តាប់ និង ផ្តល់ដំណោះស្រាយជូនប្រជាពលរដ្ឋភ្លាមៗ ចំពោះបញ្ហាដែលស្ថិតក្នុងសមត្ថកិច្ច ព្រមទាំងបានណែនាំដល់ស្ថាប័ន និងអង្គភាពពាក់ព័ន្ធ ឱ្យចុះពិនិត្យ សម្របសម្រួល និងឆ្លើយតបចំពោះរាល់សំណូមពររបស់ប្រជាពលរដ្ឋ ប្រកបដោយការទទួលខុសត្រូវ ទាន់ពេលវេលា និងស្របតាមគោលនយោបាយ និងលិខិតបទដ្ឋានគតិយុត្តជាធរមាន។
ជាមួយគ្នានេះ ឯកឧត្តមអភិបាលខេត្ត បានលើកឡើងពី កម្មវិធី TVET 1.5 លាននាក់ ដែលមានគោលបំណងផ្តល់ឱកាសដល់យុវជន និងប្រជាពលរដ្ឋទទួលបានចំណេះដឹង និងជំនាញវិជ្ជាជីវៈ ស្របតាមតម្រូវការទីផ្សារការងារ ដើម្បីមានសមត្ថភាព មានការងារធ្វើ និងមានប្រាក់ចំណូលសមរម្យ ដែលជាផ្នែកមួយនៃការចូលរួមអនុវត្តគោលនយោបាយអភិវឌ្ឍធនធានមនុស្ស និងលើកកម្ពស់ជីវភាពប្រជាពលរដ្ឋ។
ការលើកឡើងរបស់ឯកឧត្តមអភិបាលខេត្តខាងលើ ក៏ស្របតាមទិសដៅ និងផែនការយុទ្ធសាស្ត្ររបស់ ក្រសួងការងារ និងបណ្តុះបណ្តាលវិជ្ជាជីវៈ ក្នុងការជំរុញការអភិវឌ្ឍជំនាញវិជ្ជាជីវៈ បង្កើតឱកាសការងារ និងលើកកម្ពស់ប្រាក់ចំណូលរបស់ប្រជាពលរដ្ឋ ជាពិសេសយុវជននៅតាមមូលដ្ឋាន។
ក្នុងឱកាសនេះ លោក ណយ ច័ន្ទតារា ប្រធានមន្ទីរការងារ និងបណ្តុះបណ្តាលវិជ្ជាជីវៈ ក៏បានចូលរួមចែកកូនដូងជូនប្រជាពលរដ្ឋ ដើម្បីជំរុញការដាំដុះ បង្កើនប្រភពចំណូលសម្រាប់គ្រួសារ និងចូលរួមលើកកម្ពស់ជីវភាព ព្រមទាំងការថែរក្សាបរិស្ថាននៅមូលដ្ឋាន។
វេទិកាសាធារណៈថ្នាក់ជាតិនេះ បានបង្ហាញពីការយកចិត្តទុកដាក់របស់រាជរដ្ឋាភិបាល និងអាជ្ញាធរមូលដ្ឋាន ក្នុងការស្តាប់បញ្ហា ស្វែងរកដំណោះស្រាយ និងឆ្លើយតបចំពោះតម្រូវការជាក់ស្តែងរបស់ប្រជាពលរដ្ឋ ព្រមទាំងជំរុញការអនុវត្តកម្មវិធីនយោបាយ និងយុទ្ធសាស្ត្ររបស់រាជរដ្ឋាភិបាល ឱ្យកាន់តែមានប្រសិទ្ធភាព និងប្រសិទ្ធផលនៅមូលដ្ឋាន។
