Geir Daasvatn Foto

14/09/2026

Nesjendammen, eller eigentleg Nesjendammane, ligg ved enden av Nesjenvegen, heilt nord i Fjotland i Kvinesdal. Dammane demmer opp fleire tidlegare vatn og gjer Kvifjorden til eit svært magasin for Solhom kraftverk. Dammen blei bygd 1966–1968. Då var største høgda 50 meter. Han blei rehabilitert i 2019–2022. Etter det arbeidet er største høgda auka til 52 meter. Anleggsvegen Nesjenvegen går nordover til dammen frå Risnes i Kvinesdal. Eg lurer på om lengda på vegen er rundt 22 km. Han er open for vanleg ferdsel. Så då fekk eg sjansen til å sjå dette svære anlegget litt tidlegare i haust 😃

13/09/2026

For meg som bur i furuskogen heime i Hornnes er det alltid gjevt å kome opp i fjellheimen. Å sykle frå Ådneram i Sirdal opp til den svære Svartevassdammen tidlegare denne veka var ei stor oppleving. Her er nokre glimt frå Godfarlonene, som ligg like sør for dammen.

10/09/2026

Den enorme Svartevassdammen ligg langt inne i Setesdal vesthei-Ryfylkeheiane landskapsvernområde. Han demmer opp Svartevatn og fleire andre vatn nordover heilt til Bykle til eitt av dei største reguleringsmagasina i Norge. Eg lurer på om eg har lese ein stad at det er det 4. største i landet. Det aller største er Blåsjø. Dammen var den største i Nord-Europa då han stod ferdig i 1976. Høgda var 129 meter. I 2011–2015 skjedde ei større rehabilitering og erosjonssikring. Høgda auka med to meter, til 131 meter. Lengda på damkrona etter rehabiliteringa er 415 m. Bredda i botnen er 420 m. Det er store dimensjonar! Svartevatn er inntaksmagasin for Duge kraftverk. Alle desse anlegga er ledd i den svære Sira-Kvina-reguleringa som Sira-Kvina Kraftselskap står bak og administrerer. Det største kraftverket er det på Tonstad. Det går ein fin, asfaltert anleggsveg inn til Svartevassdammen frå Ådneram i Sirdal. Han er stengt med bom og ordinær trafikk med bil er forbudt. Men er du i normalt god form er det ein flott sykkeltur. Eg er dessverre ikkje i normalt god form, så for meg var det tungt, i lengste laget (ca. 14 km ein veg) og mange tunge oppoverbakkar. Men fantastisk å kome fram og endeleg kunne sjå den mektige dammen – og fjellheimen – i all sin prakt 😁

04/09/2026

Fråflytta, men magiske Salmeli i Fjotland 2. september 💝 Salmeli er utpeika som eitt av 104 verdifulle kulturlandskap i Norge. Per Øyvind B. Tørresen utfører hogst- og kulturlandskapspleie. Han og sambuar Lene Olsen fekk Kulturlandskapsprisen i Agder 2022 (Norsk Kulturarv) for det store arbeidet dei har gjort for å ta vare på dette unike landskapet. Eg kom "berre" forbi Salmeli på veg heimover etter å ha vore og sett på det svære damanlegget i søre enden av Nesjen/Kvifjorden. Det var utruleg mykje spennande å studere her for meg som er interessert i gamle kulturminne. Eg trur iallfall eg såg ei gamal kverntuft + den spesielle, lange buvegen til utmarka. Men eg hadde minimal kjennskap til plassen frå før. Så eg gjekk nok forbi det meste 😱 Nå vil eg skaffe meg dei nye Fjotlandsbøkene og lese meir om Salmeli. Tobias Salmelid har også skrive ei heil bok om gardshistoria (2003). Så håpar eg å få til ein ny tur til denne spesielle staden før vinteren 😃

28/08/2026

Av og til "rotar" eg meg litt langt avgarde heimanfrå 😃

Ved den no mest tørrlagte elva Vai på Haukeli i Vinje kommune står det eit nydeleg, gamalt kvernhus.

27/08/2026

Det fine stolpehuset på Vatne i Mykland 24. august 2026. Det kan iflg. opplysningar i SEFRAK-registeret vere 300–400 år gamalt!

26/08/2026

Eg nemnte den gamle Kolandsheivegen i eit innlegg for nokre dagar sidan. Det er vegen mellom Hægeland og Bjelland, det som i dag er Fylkersveg 462. Den første køyrevegen for hest og kjerre over heia her blei bygd i fleire etappar. Frå Bjellandsbrua opp til Sylvskaret kom han i 1862 iflg. Torfinn Normann Hageland i "Gamle veger i Vest-Agder" (Statens vegvesen Vest-Agder, 2000, s. 290–291). Her er nokre glimt av den nydelege gamlevegen det siste strekket oppover mot Sylvskaret. Perfekt for ein liten spasertur om du er på dei kantar 😃

21/08/2026

SKOGEN ER FULL AV KULTURMINNE!
Eg blei ikkje interessert i foto før eg nærma meg 50-årsalderen 😱 Eg blei sjuk og måtte finne noko anna meiningsfylt å bruke tida mi på enn arbeidet som jurist. Fotografering var då ein av hobbyane eg smått om senn kom i gang med. Det var godt for helsa å dra ut på tur i skogen med fotoapparatet rundt halsen.

I starten hadde eg ikkje nokon spesiell tanke om kva eg ville ta bilde av. Ja, eg visste eigentleg knapt korleis eg skulle få tatt eit bilde med apparatet 🤠 Så eg bare prøvde å ta eit bilde når eg syntes eg såg noko fint.

Men på desse turane rundt om i skogen såg eg at her var det utruleg mykje spennande å finne som eg aldri hadde visst noko om. Til dømes slikt som kan gå under stikkordet "kulturminne". Eg såg gamle sagstemmar, nedrasa hus, flotte tømmerhus, spora etter Setesdalsbanen, eldgamle steingjerde, kverntufter med kvernsteinar i botnen, steinskjermar etter tømmerflotinga, nydelege steinkvelvbruer og gamle brukar, nesten gløymde husmannsplassar, små minikraftverk og mykje, mykje meir.

Det blei etter kvart litt interessant å finne ut noko meir om alt det eg såg. Då oppdaga eg Kulturminnesøk.no. Det er ei nettside som Riksantikvaren har ansvaret for. Der er det opplysningar om og kartfesting av fleire hundre tusen kulturminne i heile Norge. Mykje er lagt ut av profesjonelle kulturminnefolk i fylkeskommunane m.v. Men engasjerte privatpersonar kan óg opprette ein brukarprofil og legge inn kulturminne.

Det har blitt ein veldig givande hobby for meg! Eg får meg litt fysisk aktivitet på dei mange turane ut i skog og mark der eg kan ta alt i mitt eige tempo. Eg blir mykje betre kjend her eg bur og i nabobygdene. Og om 100 år eller meir kan gamle foto som dokumenterer kva for kulturminne som fantes ute i naturen før i tida kanskje ha ein liten verdi for nokon 😁
Etter den spede starten passerte eg just 8.000 foto som eg har lagt inn på Kulturminnesøk.no. Bilda er sjølvsagt i hovudsak frå Evje og Hornnes og Setesdal. Men etter som åra går utvidar eg stadig "horisonten". Sist nå har eg vore fleire kveldar til Bjelland for å sjå etter spor etter den gamle Kolandsheivegen mellom Sylvskardet og Askedalen. Det er like aust for Bjelland sentrum og eit veldig spennande område for meg som er glad i dei gamle vegane. Bildet er ein kulvert ute i skogen der, på det eg vil tru er den første køyrevegen frå ca. 1862.

Den store inspirasjonskjelda mi når det kjem til vegar her i området er Torfinn Normann Hageland. Han har skrive om – og truleg traska langs – omtrent alt som finst av vegar i heile Vest-Agder! Eg les litt i den eminente boka hans om "Gamle veger i Vest-Agder" og så dreg eg avgarde for å sjå om eg kan finne nokre av desse vegane han skriv om.

Det er slett ikkje alt i livet som blir som planlagt eller tenkt eller drøymt om. Iallfall er det slik med mitt liv. Men så kan det opne seg nye moglegheiter og nye "horisontar". Fotointeressen og kulturminna er "nye" hobbyar som eg har stor glede av. Dei har vore med og gjort livet givande sjølv om eg ikkje har eit lønna arbeid å glede meg over 💝

10/08/2026

Den fine Geitskarbrua på Fylkesveg 4040 over Mandalselva like nord for Kylland i Åseral i kveldinga 8. august 2026.

06/08/2026

På "road-tripen" min til Hardanger sist helg var eg også innom den gamle Haukelivegen gjennom Dyrskar. Dyrskar var det høgaste punktet på gamlevegen, 1 157 moh. Geir K. Hus har skrive eit heilt kapittel om vegen her i den flotte boka si "E134 Haukelivegen". Men uheldigvis hadde eg ikkje studert det kapittelet så nøye før eg la ut på turen. Eg stoppa bare meir eller mindre tilfeldig langs vegen og gløymde å kikke etter den berømte Dyrskartunnelen 😱 Eg er ikkje så flink på planlegging. På den andre og meir oppløftande sida har eg då ein veldig god grunn til å ta ein ny tur til Haukelifjell og Dyrskar når det lid ut på hausten 🤠 Vegen mellom Dyrskar og Svandalsflona var den siste delen av vegen over fjellet. Då dette stykket kom på plass, i 1889, var det endeleg ein heilt ferdig hest- og kjerreveg mellom aust og vest.