15/06/2026
MGA KALAMBOAN SA SYUDAD GITAHO NI MAYOR KLAREX SA 4TH STATE OF CITY ADDRESS
ATOL sa kasumaran sa ika-76 nga pagka HIMUGSO sa syudad, dakong kalipay ug garbo ni Mayor Rolando "Klarex" Uy ang paghatud sa katawhan sa mga kalampusan sa iyang administrasyon sulod sa usa ka tuig, adlaw'ng Lunes, Hunyo 15 ning tuig sa Plaza Divisoria ning syudad.
Kini mao na ang ikaupat nga State of City Address ni Mayor Klarex sugod sa iyang administrasyon.
Ubos sa RISE Agenda sa mayor ug sa tema nga “Gasa sa Kagahapon, Garbo sa Karon, Giya sa Kaugmaon,”gipakita niini ang mga nakab-ot sa administrasyon diha sa pagpalig-on sa serbisyo publiko, pagpalambo sa ekonomiya, ug paghimo sa mas luwas ug andam nga siyudad alang sa mga Kagay-anon.
Atol sa maong programa, gilusad usab ang 75th Commemorative Stamp, usa ka simbolo sa kaagi sa siyudad gikan sa iyang makasaysayanong sinugdanan padulong sa usa ka mas buhi, progresibo, ug dinamikong syudad karon.
Dugang pa gitunol usab ang 400 years coffee book nga gimugna ni 2nd District Rufus Rodriguez. Ang libro naglangkob sa mga kasaysayan, hulagway, ug mga record sa syudad sulod sa upat ka siglo gikan sa kagahapon hangtod karon, uban ang garbo sa kultura, tradisyon, ug sa katawhang Kagay-anon diin kini magsilbing sumbanan alang sa mga sumusunod nga henerasyon sa mga Kagay-anon.
Ang programa gisalmotan sa mga National Government Agencies, regional directors, uniformed personnel, 21st City Council kauban si Vice Mayor Jocelyn Bebot Rodriguez, 2nd District Rufus Rodriguez, Board Member Princess Emano, mga punong barangay kauban si Brgy Carmen Punong Barangay Kikang Uy, mga business partners, city hall department heads ug mga kawani sa City Hall.
Ang SOCA ni Mayor Klarex nagpakit sa padayon nga paningkamot sa administrasyon sa pagtubag sa mga panginahanglan sa mga Kagay-anon pinaagi sa mga programa ubos sa RISE Agenda. Gipakita niini ang direksyon sa dakbayan padulong sa mas lig-on nga serbisyo, malungtarong kalamboan, ug mas progresibong siyudad alang sa umaabot nga henerasyon.(DYM/CIO/Photos by Jhoanne Abejo/CIO)
