26/11/2025
Madamo nga mga Konsumidor ang nagapamangkot ano ang tinutuyo sa gin-file nga Bill para sa Expansion sang More Power sa Probinsya sang Iloilo.
Ang KURYENTE amo ang backbone sang aton Ekonomiya.
Ang tag-iya sang More Power amo si Mr. Enrique Razon, isa sa pinakamanggaranon nga tawo sa pungsod, isa ka Tycoon. Ano pa bala ang aton mapaabot sa iya? Syempre, ang sakupon kag kontrolon ang ekonomiya sang aton pungsod—ang KWARTA amo ang GAHUM (Money is Power). Ang mga nagduso sini kag ang mga resolusyon parte lang sang ila "game plan," madugay na nila ini nga gin-planu gamit ang ila mga koneksyon kag gahum; tuman ka mainandamon ang pagtukod sang sini nga mga plano.
Dugang pa, sa pila ka dekada, gin-dominar sang pamilya GARIN ang kalabanan nga mga munisipyo diri sa 1st District sang Iloilo, gani subong mahapos na lang sa ila nga himuon ang tanan nga gusto nila sa aton ekonomiya. Makita naton ang manifestasyon sini sa karon nga panahon. Magahambal sila nga "naghatag na sang resolution ang mga kabanwahanan nga pasudlon ang MORE POWER sa probinsya sang ILOILO, kay ini MAJORITY decision."
Gabaan kamo! Malamang kay "under" sang pamilya GARIN ang mga nagapungko sa pwesto—under ni Garin ang Guimbal kag Miagao, kag Garin man ang former Mayor sa Banwa sang San Joaquin nga amo man ang nagduso sang resolusyon para sa expansion sang More Power sadto. Ginplano na nila ini nga daan para sa ila kaugalingon nga benepisyo kag interes.
Ang pinakamaathag nga halimbawa sini amo ang CENECO (Central Negros Electric Cooperative), nga subong na-takeover na sang Negros Power Corp. (nga pareho man ang tag-iya sa More Power). Sa tunga sang paglaslas ni Bagyong Tino kag sige-sige nga ulan, ining Negros Power puros lang "flex" kag pa-bida sa social media, pero ang mga pumuluyo sang Negros pila na ka semana nga nagahibi tungod sa malawigan nga Brownout/Blackout.
Ano ang pulos sang pag-flex ninyo sa Social Media kung wala man sang may naga-ubra? Kung wala pa gin-bombarde sang reklamo kag ginbatikos, wala man kamo action. Nangin reactive lang sila sa natabo nga bagyo, na-overwhelm? Kag natabo ini simpleng tungod kay wala sila nagapang-hire sang mga linemen. Ang ila manpower puros contractual—indi man gani skilled, minimum wage pa, kag kulang sa benepisyo. "Hina ang ila manpower kag resources," wala sila sang Task Force Kapatid pareho sang mga Electric Cooperatives kag iban pa.
Samtang nagasakripisyo ang mga konsumidor sa madulom nga kagab-ihon kag mainit nga panahon kung adlaw, ang mga nakapwesto sa ibabaw hayahay lang nga nagapungko kag nagakadlaw samtang ang kwarta sa ila bulsa nagapalanglapaw. Ang mga konsumidor wala sang kinamatarong magreklamo. Nagahulat na lang sa madugay nga serbisyo kung san-o magsiga kay kulang ang naga-ubra—wala kuryente, wala tubig, kag wala Internet. Ang mga konsumidor wala gid sang boses ukon gahum sa ila.
Pareho man sa nagakatabo sa aton National Government subong, tuman ka talamak ang korapsyon. Tama ka hayag sa tanan, ang personal nga interes sang tagsa ka hakog nga politiko nagamot na gid sa ila mga tul-an. Tapos mangita sila sang mga "sacrificial lamb" nga dakpon kung magkabukingan na, pareho sang mga engineer sang DPWH nga naga-ubra man lang sang matarong, pero sila pa ang pagadakpon kag prisohon. Sila ang matuod nga biktima sining dunot nga sistema sang gobyerno. Makaluluoy ang mga ultimo nga pumuluyo samtang ang mga ara sa pwesto nagapakabusog sa pag-takeover kag pag-overpower sa mga propriedad nga ginapanag-iyahan sang publiko. Nagapakabusog sila sa pagpangawat sang kwarta nga ginpaduguan kag ginpabalhasan sang mga pobreng Pilipino.
Oo, maayo ang kompetisyon generally. Pero kung gusto niyo gid man magserbisyo sa tawo, ngaa indi ninyo pagsuportahan ang Electric Cooperative nga dekada na nga nagaserbisyo sa lugar nimo? Kung ang tagipusuon niyo para gid sa public interest kag kauswagan sang mga Ilonggo, pwede man kamo makahatag sang hagna ukon pondo nga makabulig kag makapabakod sa serbisyo publiko sang Kooperatiba. Pwede kamo makahatag sang additional supplements ukon mag-obra sang inisyatibo kung gusto ninyo makabulig. Dumdumon ninyo, ara kamo sa posisyon, pwede kamo makabulig sa mga nagakinahanglan NGA INDI magpakig-kumpetensya ukon magguba sang Public Distribution Utility.
Pero indi ninyo ina paghimuon kay wala kamo KICKBACK ukon share nga mabaton kung kooperatiba ukon pumuluyo ang nagapanag-iya kag nagapadalagan sang Electric Cooperative.
Pero sa tion nga ang More Power na ang mag-takeover sa mga Electric Cooperatives diri sa probinsya sang ILOILO, ang tanan nga benepisyo magasulod sa inyo mga bulsa. Ang benepisyo nga para dapat sa publiko, igasulod lang sa bulsa ninyo. Ginhimo ninyo ini nga wala ginapaminsar ang bwas-damlag sang inyo kapwa Ilonggo nga nagbulig kag nagbotar sa inyo para mabutang sa sina nga posisyon. Nga tani kamo man ang mabulig sa ila sa pagpangabuhi para mag-uswag. Call to serve people kuno, pero Personal Interest ang gina-una? Isa ka panamatasan nga SALIMPAPAW!
Pareho sang akon ginhambal, pwede mabuligan ang Cooperative sang gobyerno kung kulang gid man ang kapasidad nga indi kinahanglan kumpetensyaan ukon gub-on. Pero masubo hambalon, nagapangibabaw ang Personal nga Interes sang mga Politiko. Honestly speaking, wala ginakulang ang ILECO sa serbisyo, yes basi ara sila sa maintenance period subong, pero mapaminsar mo bala ang masobra 5 ka dekada sa serbisyo (50+ years)? May mga poste gid man nga gabok kag mga transformer nga kinahanglan i-upgrade kay nagadamo na ang Consumers, kag amo na ang ginahimo nila subong. Competent sila kag may ikasarang magserbisyo sa tawo. Ang ila mga empleyado hanas kag maayo mag-ubra. Ang sistema sa sulod sang kooperatiba maayo kag organisado, pero nagasulod ang interes sang mga politiko.
Mga nakulangan sa kwarta gani ginapasilabtan ang Kooperatiba nga masobra na 5 ka dekada nga nagafunction kag nagaserbisyo sang intsakto. Masobra 50 years nga naghatag sang kasanag sa panimalay sang mga Ilonggo, naghatag sang manami nga serbisyo sa publiko. Ang Competition/Takeover indi amo ang yabi para sa progresibo nga komunidad! Ang kinahanglan amo ang husto nga suporta halin sa Gobyerno, pero sila pa ang nagatinguha nga gub-on ini para sa ila kaugalingon nga interes.
Basi asta na lang ta di kaja sa rant kay sila man gihapon ang masunod sa babaw. Pero amo ina ang realidad nga nagakatabo sa panahon karon. Gani banwa, magpanilag kag magpang-ino-ino kung ano ang dapat kag intsakto.
Sa husto nga tion, maangkon ang Hustisya sang mga Pilipino nga tuman nga nag-antos tungod sa personal nga interes sang mga hakog nga politiko.
Maga-abot ang gaba sa mga nagakadapatan.
Kabay pa nga magpatunga ang Ginoo kag bag-uhon ang tagipusuon sining mga hakog nga politiko nga ara sa pwesto.
