24/03/2026
في رحلة الوعي والتعافي، لازم تدرك حقيقة إن أصعب مواجهة مش مع الناس اللي آذوك، أصعب مواجهة هي مع "نفسك القديمة".
النسخة اللي غلطت، اللي اختارت غلط، اللي سكتت في وقت كان لازم تتكلم فيه، والنسخة اللي وثقت في ناس ما تستاهلش، النسخة دي كتير مننا بيحاول يهرب منها،
أو يفضل يجلد فيها ليل نهار.
لكن لو فضلت تكره نفسك على اللي فات، وتأنبها بكلمة "أنا إزاي عملت كدة؟".. مفيش حاجة هتتغير، لأنك ببساطة لسه مسجون جوه نفس اللحظة، ونفس الوجع.
الحقيقة اللي لازم تواجهها وتتصالح معاها:
أنت وقتها ما كنتش بالوعي اللي أنت فيه دلوقتي.
ما كانش عندك نفس الأدوات ولا نفس الخبرة اللي اكتسبتها "بعد" الوجع.
أنت بتحاكم "طفل" بوعي "رجل"، وبتحاكم "جاهل بالحقائق" بعقلية "خبير" شاف النهاية.
محدش بيبدأ الرحلة وهو فاهم كل حاجة، ومحدش بيغلط لمجرد إنه عايز يأذي نفسه،
إحنا بنختار على قد وعينا وقتها، وبنتعلم لما بنتوجع.
الاستمرار في جلد الذات مش وعي، ده "هروب" مُقنّع من إنك تسامح نفسك وتكمل حياتك.
التعافي الحقيقي مش إنك تمحي الماضي، التعافي إنك تبص لنفسك القديمة وترحمها، مش تعاقبها.
بدل ما تسأل: "أنا عملت كدة ليه؟".. اسأل نفسك: "أنا اتعلمت إيه من اللي حصل؟".
طول ما أنت شايف نفسك القديمة "عدو"، هتفضل الحرب شغالة جواك ومستنزفاك، لكن أول ما تحتضنها وتفهمها، هتقدر أخيراً تتحرك لقدام.
التعافي مش إنك تبقى شخص جديد تماماً، التعافي إنك تحتوى كل نُسخك القديمة بسلام.
قال رسول الله ﷺ:
"كُلُّ بَنِي آدَمَ خَطَّاءٌ، وَخَيْرُ الْخَطَّائِينَ التَّوَّابُونَ"
د. قمر ريشي
