30/12/2025
بيت ناس العروس ..🩵
زيارة رجال وشُوره و سد مال ، ماشين ناس العِرس و جايين من ناس العِرس ، فُندق و يد فُندق وصوت شق في عود صندل ، دق الريحة ، كبابي شاي أحمر و جَبَنة الحديد أُم ليفة و فناجين مكفكفات على ريحة بخور تيمان على وش صينية و صوت حريم يطلع على قولة مُرسال و مُناوله و باقي ونسة البارح في حريم الحي الما جَن يسدّن فرقة الواجب ، مكنة الفطير ماده يدها و لمعة إستيلها عاكسة سن دهبيّة في نص ضحكة ، صواني فطير و خبيز مردومه ، دلوكة مخموجه تجيب الطاشي أصلو حرروها هسه بي جمرات و "دا اليوم الدايرنو ليك " ، ماشين ناس العِرس و جايين من ناس العِرس ، شنط المسافرين الواصلين قُبال عشرة يوم بقت هي تصبّح و تمسي الناس و المكان ، مشاغلات العروس من الداخل و المارق البتحصلها في بيت الجيران الحابسنها فيهو بعد البيت إتملا "صحي العروس للعريس و الجري للمتاعيس" ، و كم كِشّيمَه كده من صاحباتها بعد يِهِدُوا حِيلهِن بالمراسيل و تطقش أضانهم دعوة (عُقبالكِن عـــاد) يقابلنها بي آمين و يزوغن تاني ، الجير الجديد و ريحة البُهية و باب الشارع الما بتقفل ، صحن الحِنة و كم شمعة و ضريرة معجونة في سُكرية ، صف أولاد راجي الحِنة ، أخوان العروس البنادوهم كل ما تنقص حاجة و الأولاد البرسلوا ليهم يشيلوا و يختوا ، صيوان الخِدمة و القيزان أُمات حروف بالبُهية أو المنكير ، نضافة الخدار بالليل ، شُفع مجدعين في السراير بعد يوم ملان لعب مع شفع ما بلاقوهم إلا في المناسبات ، بيوت الجيران المفتوحة و ملانة ضيوف ، بسكويت بيت العِرس الكبــار و لمة شاي الصباح و باقي الونسة و حِس مقروش من الزغاريت ، يدخل شاب (يا جماعة وين النسوان الماشات يودن فطور العريس العربية جات) ، فطور العريس زاتو ، صيوان الرجال و صواني الصُفَر تتطاقش مع صناديق الحاجة الباردة ، البرميل البملوهو تلج و يختو فيهو قزاز البارد زاتو ، و الناس تدبّل ســاكت زول يجيب خبرهم مــاف ، كراس الكَشِف و علبة الماكنتوش الفاضية ، نسوان الحِلة البكتبوهن بي أسماء رجالهن ، قعدات الشُلَل ،
هوي كَفيتوا الناس كلها ؟ .. الناقصكم شنو .. ناولونا رغيف ..
المناديل المفرّشه في الصواني المارقه للعَقِد ، الخبيز و بلح العَقِد أبو سمسم ، يجي داخل أبوها يقول عقدنا و صوت الرصاص يتلخبط بي الزغاريت و بكى أُمها و أخواتها و المِجاملاتنهِن ، العُقبه عند العزابة ، العروس في بيت ناس فلانة بلبسوها ، ناس العريس وصلوا ، قومن هي السيرة جات و يتلاقى صوت دلوكتين أي واحده صوتها فوق التانية مرات تسمع الغُنا للعروس و مرات للعريس ، سلامات و مباركات و صواني خبيز و بلح طلعت تاني كانوا شايلنهن على جنبَه من قبيل يوصوا فوقهن النسوان الكُبار عشان يملو العين و النصيحة مدنكلات ما زي حقات قبيل ، الناس يا داب هجصت و إنقسمت ناس قامت تجهز للحفلة و ناس مع ختت عشاء ناس العريس ، الجيران البحصلوا الكراسي القدام أصلو ناس بيت العِرس بباروا الونسة لمن يقوموا يتجاروا بعد يسمعوا هفّت الساوند ، نفس منظر الشفع زي كل يوم مجدعين في السراير مع إنهم الليلة كانوا مظبطين للحفلة من المغرب و كم حاجّة كبيرة ما ليهن في الحفلات خلاص كملنها زمان لمن كان في حيل ، خلونا من غُنا هسي دا غُنا الحفلات زمان كان غير و الله ، الكشافات الحمراء ، تلاته بِنيات حِردن الحفلة عشان جو متأخرات و لقو الأولاد كتار لمن قافلين مدخل الصيوان ، العرسان جو ، غايتو الحفلة بتكون مدورة لمن الناس تفتَر و ما أظن يفتروا ، ناس العريس راجعين و لا بايتين ؟ ، الصُبحية و قولة الجِرتق ، العنقريب أبو ملاية مخمل و جريدتين نَخَل ، صينية الجرتق و البخور و كباية اللبن ، عاداتنا و عاداتكم ، نادوا فلانة تجرتقهم أمها و أبوها حيين شان فالهُم يكون سمِح ، الدلوكة و مسابقة أهل العروس و العريس في أولادهم بالغُنا تاني ، توب سُرتي و توب أحمر و قرمصيص ، ضريرة ، هلال و سبحة و حريرة ، العروس تجدّع في فالها و العريس يبُخ في الريحة و البنات يتدافرن ياخدوا في الشبال ، صوت دعوات حبوبة أريتو يا يمة بالسعادة و البخاته عليكم ومرات مرات تذكر في الناس يقولوا "ما شاء الله" و تغلبها زغروتة ف تطلع مقطعة ، أغاني الوداع و دموع الوداع ، الوصايا ، مع السلامة ، البيت بدأ يفضى إلا من صوت نسوان يتغالطن و يفرزن في العِدة ، مش الصيوان قبل شوية كان هنا ، صوت النسوان في طرف خشم الباب خلاص هن زاتهن يودعِن ، البيت فضى على أهلو ، إلا من صدى جوطة الناس الكانت هنا قبل شوية و صوت عروس لسه قبل كم يوم كانت خجلانة لمن شاوروها ..
أريتو بالسعــادة و البخاتة 💙🌵
