20/04/2026
Guddoomiyaha Wasaaradda Waxbarashada, Barbaarinta iyo Sayniska ee gobolka Awdal, Mudane Xuseen Caateeye Gaafane, oo ay weheliyaan masuuliyiin ay ka mid yihiin Madaxa Xafiiska Tayo-dhawrka Maxamed Yuusuf Jaamac, Madaxa Xafiiska Waxbarashada Tooska ah CabdiraxmaanSaleebaan Aw Xasan , iyo Kormeere Cabdiqani Xaaji, ayaa kormeer shaqo ku gaadhay dugsiyada ku yaalla degmooyinka Baki iyo Ruqi.
Kormeerkan ayaa qayb ka ah dadaallada joogtada ah ee lagu horumarinayo tayada waxbarashada ee gobolka, iyadoo si gaar ah diiradda loo saaray diyaar-garowga imtixaannada shahaadiga ah ee sannadkan, kuwaas oo ah kuwo muhiim u ah ardayda heerarka kala duwan. Masuuliyiintu waxay si dhow u qiimeeyeen xaaladda guud ee dugsiyada, heerka diyaar-garowga ardayda, iyo sida ay macallimiintu u gudbinayaan manhajka waxbarashada.
Intii uu socday kormeerku, waxa kale oo la hubiyay in manhajka waxbarashadu u socdo si waafaqsan qorshaha Wasaaradda, isla markaana la xaqiijiyo in ardaydu helayaan waxbarasho tayo leh oo la jaanqaadaysa heerarka qaranka. Masuuliyiintu waxay kulamo gaar ah la yeesheen maamulayaasha dugsiyada, macallimiinta, iyo ardayda, iyaga oo dhagaystay talooyin iyo caqabado jira si xal waara loogu helo.
Dhanka kale, kormeerka waxa si weyn loogu xoojiyay doorka guddiyada waalidiinta ee la shaqeeya dugsiyada. Guddoomiyaha iyo waftigiisu waxay kulan la qaateen guddiyadaas, halkaas oo lagu falanqeeyay sidii loo dardargelin lahaa wada-shaqaynta ka dhexeysa dugsiyada iyo bulshada. Kulankaasi waxa uu soo saaray qodobo muhiim ah oo ay ka mid yihiin:
In la xoojiyo xidhiidhka joogtada ah ee u dhexeeya waalidiinta iyo maamulka dugsiyada
In la kordhiyo ka-qaybgalka waalidiinta ee horumarinta waxbarashada carruurtooda
In la dhiirrigeliyo ilaalinta anshaxa iyo joogitaanka ardayda
Ugu dambayn, Guddoomiyaha Wasaaradda Waxbarashada ee gobolka Awdal ayaa ku boorriyay dhammaan bahda waxbarashada in ay labanlaabaan dadaalkooda, si loo xaqiijiyo guul laga gaadho imtixaannada shahaadiga ah iyo horumar guud oo laga sameeyo tayada waxbarashada gobolka.
Kormeerkan ayaa muujinaya sida ay Wasaaraddu uga go’an tahay ilaalinta tayada waxbarashada iyo kobcinta mustaqbalka ardayda ku nool gobolka Awdal.
