21/07/2026
Munaasabad ballaadhan oo lagu shaacinayey diiwaangelinta rasmiga ah ee Somaliland Ohio Association (SOA) ayaa lagu qabtay magaalada Columbus ee gobolka Ohio.
Munaasabadda waxaa ka soo qaybgalay qaybaha kala duwan ee jaaliyadda reer Somaliland ee ku nool gobolka Ohio, ajaanibta daneeya arrimaha Somaliland iyo marti-sharaf kale oo lagu casuumay munaasabadda.
Somaliland Ohio Association, oo muddo ka badan 20 sano ka shaqaynaysay arrimaha jaaliyadda, isku xidhka bulshada iyo horumarinta danaha reer Somaliland ee gobolka Ohio, ayaa hadda si sharci ah looga diiwaangeliyey gobolka. Tallaabadan ayaa ururka u saamaxaysa inuu hawlihiisa u fuliyo si rasmi ah, isla markaana uu ballaadhiyo adeegyada iyo barnaamijyada uu bulshada u qabanayo.
Intii ay munaasabaddu socotay waxaa si rasmi ah loogu dhawaaqay hoggaanka Somaliland Ohio Association, kuwaas oo kala ah:
Faysal Suubane — Guddoomiyaha
Mohamed Fuaad — Guddoomiye Ku-xigeenka
Abdisalam Burale — Agaasimaha Maaliyadda
Ibrahim Baqardhe — Madaxa Xidhiidhka Dibadda
Waxaa sidoo kale munaasabadda lagu soo bandhigay waxqabadkii ay jaaliyaddu qabatay sannadihii la soo dhaafay iyo qorshayaasha mustaqbalka ee Somaliland Ohio Association. Qorshayaashaas ayaa diiradda lagu saarayaa xoojinta midnimada iyo wada shaqaynta bulshada, taageeridda dhalinyarada iyo qoysaska, ilaalinta dhaqanka iyo afka, iyo dhisidda xidhiidh wax-ku-ool ah oo lala yeesho hay’adaha iyo bulshada kale ee gobolka Ohio.
Masuuliyiinta ururka ayaa tilmaamay in diiwaangelintani ay tahay tallaabo taariikhi ah oo xoojinaysa jiritaanka, sumcadda iyo awoodda Somaliland Ohio Association. Waxay sidoo kale muujinaysaa sida ay jaaliyaddu uga go’an tahay inay yeelato urur rasmi ah oo si hufan ugu adeega, una metela danaha bulshada reer Somaliland ee gobolka Ohio.
Munaasabadda ayaa ku soo dhammaatay jawi farxad, is-dhexgal iyo rajo wanaagsan leh, iyadoo ka qaybgalayaashu soo dhaweeyeen horumarka cusub, isla markaana bogaadiyey dadaallada lagu horumarinayo laguna mideynayo jaaliyadda Somaliland ee Ohio.
