01/04/2026
Wasaaradda Horumarinta Beeraha iyo Jaamacadda Hargaysa, Ayaa Maanta (01.04.2026) Yeeshay Kulan Iskaashi
Hargeysa (WHB) - Kulanka oo ay goob-joog ka ahaayeen Wasiirka Wasaaradda Horumarinta Beeraha Mudane Maxamuud Cigge Yuusuf iyo Guddoomiyaha Jaamacadda Hargaysa Dr Maxamed Axmed Sulub.
Sida oo kale kulankaas waxa goob joog ahaa xubno ka kala socda labada dhinac Wasaaradda horumarinta Beeraha Maxamed Sahal Iidle, Agaasimaha Waaxda Qorshaynta iyo Siyaasadaha, Lataliyaha Wasiirka, ahna Maamulaha mashruuca SDF Mudane Ibrahim Cumar Kaahin, Madaxa xidhiidhka Hay’adaha iyo isku-dubaridka Iqbal Cabdirisaq Cali, iyo Cismaan Cabdikariim Muxumed, Khabiirka qorshaynta, Sidoo kale Jaamacadda Hargaysa waxa ka socday Dr. Khalid Ahmed Abdi Guddoomiye, Ku xigeenka Cilmibaadhista, hal-abuurada iyo iskaashiga ee Jaamacada Hargaysa, Dr Jonah Jiruja, Agaasimaha Cimibaadhista iyo addeegyada bulshada, Eng Cawil Axmed Maxamed, Agaasimaha ICT-ga iyo ku simaha Xidhiidhka, Cabdiqaadir Rashiid, Isku-duwaha xidhiidhka iyo iskaashiga daneeyaasha ee Jaamacadda iyo Maxamed Cabdilahi Cumar Madaxa Machadka Isbedelka Cimilada iyo Arrimaha Deegaanka ee Jaamacadda Hargaysa.
Ujeedadda kulanka ayaa ahayd in Wasaaradda iyo Jaamacadda Hargaysa ay iska kaashadaan horumarinta xogta iyo cilmibaadhista ee dhinaca Beeraha, si dhammaan hal-abuurada iyo dedaalada lagu saleeyo xog iyo cilmibaadhis sugan gaar ahaan tayaynta in la helo xogta Wax-soosaarka oo sugan, saamaynta abaaraha iyo isbedelka cimilada ee wax-soosaarka, maaraynta ciida iyo biyaha, maaraynta cudurada iyo cayayaanada iyo daraasadaha in dhinaca suuqgaynta wax-soosaarka waddanka.
Sidoo kale waxa ay iska kaashan doonaan in la tayeeyo lana kobciyo xirfada iyo aqoonta shaqaalaha Wasaaradda, iyo in ardayda Jaamacadda Hargaysa ee Kuliyada Beeraha ka qayb qaadan doonaan shaqooyinka Wasaaraddu ku hawlan tahay si xirfadooda loo kordhiyo.
Kulanka waxa si rasmi ah u furay Wasiirka Wasaaradda Horumarinta Beeraha iyo Guddoomiyaha Jaamacadda Hargaysa, waxaan lagu falanqeeyay in wada shaqaynta Wasaaradda iyo Jaamacaddu ay noqoto mid wax wayn ka tari doonto siyaasadaha iyo go’aan qaadashada arrimaha lagu horumarinaayo wax-soosaarka iyo isku-filnaansha cuntada waxa aan la isla qaatay in kulankan uu noqon doono kulankii kowaad ayna wasaaradda iyo Jaamacaddu wada geli doonaan heshiis isfaham wadashaqayneed. Ugu danbayn waxa ay u mahadnaqeen xubnaha farsamo ee hawshan ka soo shaqeeyay gaar ahaan Jaamacadda Hargaysa Qaybta Cimibaadhista iyo Addeegyada Bulshada iyo Waaxda Qorshaynta iyo Siyaasadaha Wasaaradda gaar ahaan qaybta Xidhiidhka Hay’adaha iyo Iskaashiga.
CMJ Photography
