29/01/2026
ππ¨π₯ππππ‘ππ ππ’πππππ & ππππͺππ¦ππππ π«π¨ππ¨π¨π πππ π«π«π«β
Gobolka Selel ee JSL waxa ka aloosan xaalad colaadeed oo si cad loo dareemayo durbaanka dagaal, taas oo ay hormuud ka yihiin madax-dhaqameedka gobolka Awdal, kuwaas oo si fagaare ah u iclaamiyay dagaal ka dhan ah beesha Ciise. Arrintani ma aha mid qarsoon ama hadal-hoosaad ah, balse waa mid maanta gaadhay heer ay warbaahinta la hor istaagaan, iyaga oo ku baaqaya weerar lagu qaado bulsho ka mid ah muwaadiniinta Jamhuuriyadda Somaliland.
Dhinaca kale, odayaasha dhaqanka beesha Ciise oo maalmo ka hor Hargeysa kaga dhawaaqay baaq nabadeed, kuna boorriyay walaalahood wada-dhashay in la ilaaliyo nabadda iyo wada noolaanshaha, codkooda lama tixgelin, mana noqon mid laga hoos qaado ama lagu hakiyo durbaanka colaadda ee sii xoogaysanaya.
Waxa iyaduna si weyn loo dareemayaa kaalinta liidata ee xukuumadda Somaliland ka qaadanayso xaaladdan, iyada oo u muuqata daawade uun, h**e iyo hadaba. Tani ma aha markii ugu horraysay ee xukuumaddu ku fashilanto maaraynta arrimaha la xidhiidha beesha Ciise, waxaana tusaale cad u ah sida masuuliyad-darrada ah ee loo maamulay dhacdadii buugga xeer Ciise, oo ay dadka deegaankaasi doonayeen inay si nabdoon ugu qabsadaan bandhiga buuga xeer-ciise magaalada saylac, balse xukuumaddu ay ka bixisay tafsiir qaldan.
Maanta se xaaladdu way ka sii darantahay, colaadda taagan xukuumadda k**a muuqato wax tallaabo ah, iskuday nabadeed ama dadaal lagu joojinayo dhiig daata. Halkii laga filayay in dawladdu dhex-gasho, odayaasha isu keento, sharcigana la tiigsato cid kasta oo dagaal iclaamisa, waxa muuqata hagrasho iyo aamusnaan dhanka xukuumada ah, gaar ahaan wasaarada arimaha gudaha oo iyadu qaranka uga masuul ah amniga gudaha.
Xukuumaddu waa inay doorkeeda dastuuriga ah qaadato, bulshadana walaalaha ahna ee awdal & selelna isku keento oo midayso.
Muwaadiniinta waxa uu dastuurku u damaanad qaaday xuquuq siman, badbaado iyo sharci isku mid ah, sidaa darteed colaad-hurinta hada taagani waa masiibo qaran. Waa in nabadda loo kacaa, dadka qaldanna runta loo sheegaa, ciddii hurinaysa colaaddana sharciga la hor keenaa, si loo badbaadiyo midnimada, wada noolaanshaha iyo mustaqbalka Somaliland.
